387 total views
Hindi itinuturing na bayani ni Department of Social Welfare and Development Secretary Judy Taguiwalo si dating pangulong Ferdinand Marcos.
Ito ang inihayag ng kalihim kasunod ng paglilibing sa dating Pangulo at diktador na si Marcos sa libingan ng mga bayani kaninang tanghali.
Ayon sa kalihim, mayroon siyang personal na dahilan kung bakit kailan man ay hindi nito matatanggap na naihimlay sa libingan ng mga bayani ang dating pangulo.
Dagdag pa nito may mga kaibigan siyang nakaranas ng torture sa ilalim ng pamumuno ni Marcos.
“Marami akong kaibigan, kakilala, mga nanay at tatay nila na namatay, pinatay sa panahon ng diktadura, yun ang aking kontexto. Kaya nung May 31 na i-appoint ako ni President Duterte bilang Secretary, sinabi ko personally hindi talaga, and I think the president knows that where I stand personally, yun ang tindig ko hindi ko sya tinuturing na bayani.” Pahayag ni Secretary Taguiwalo.
Alas dose ng tanghali ng Nobyembre 18, 2016, naihimlay sa Libingan ng mga Bayani ang mga labi ni dating Pangulong Ferdinand Marcos.
Isinagawa ang pribado, payak at lihim na seremonya bilang tugon sa kahilingan ng pamilyang Marcos.
Gayunman, marami pa rin ang nagpahayag ng kanilang hinanakit at galit dahil sa pagkakalibing ng diktador kasama ang 49, 000 mga sundalo at war veterans sa Libingan ng mga Bayani.
Una ng inihayag ni dating CBCP president Lingayen-Dagupan archbishop Oscar Cruz na ang isang yumao ay dapat inililibing ang katawang lupa para na rin sa ikatatahimik ng kaluluwa nito.
