7,829 total reads
Inaanyayahan ng pamunuan ng Minor Basilica and Metropolitan Cathedral of the Immaculate Conception o mas kilala bilang Manila Cathedral ang mga mananampalataya na makiisa sa pagdiriwang ng Flores de Mayo ngayong buwan ng Mayo, bilang pag-aalay ng parangal sa Mahal na Birheng Maria.
Bilang bahagi ng selebrasyon, binuksan para sa publiko noong Mayo 3, 2026 sa Nuestra Senora del Pilar Chapel ng Manila Cathedral ang isang Marian exhibit na pinamagatang “INAY,” na nagtatampok ng mga imahe ni Maria at ng Batang Hesus.
Bahagi ng gawain ang pag-aalay ng mga bulaklak o floral offering na isasagawa sa bawat araw ng Linggo ngayong buwan ng Mayo, habang magkakaroon rin ng pananalangin ng Santo Rosaryo tuwing alas-11:45 ng umaga mula Lunes hanggang Biyernes ng buong buwan.
“As the month of May approaches, we invite everyone to take part in the beautiful and meaningful celebration of Flores de Mayo, as we dedicate the month of May in honor of the Blessed Virgin Mary, the Mother of Jesus, through offerings of flowers, and praying the rosary. On May 03, 2026, we will open an exhibit featuring images of Mary and the Child Jesus entitled “INAY.” Let us come together in faith, unity, and devotion as we honor the Virgin Mary this month of May.” Bahagi ng paanyaya ng Manila Cathedral.
Layunin ng gawain na patuloy pang palalimin ang debosyon ng mga mananampalataya sa Mahal na Birheng Maria bilang tagapamagitan kay Hesus.
Ang Flores de Mayo ay isa sa pinakakilalang tradisyong Katoliko sa bansa na nagpapakita ng pagmamahal at paggalang sa Mahal na Birheng Maria.
Inaanyayahan naman ang lahat na makibahagi sa mga gawain at sama-samang ipagdiwang ang pananampalataya sa ilalim ng paggabay ng Mahal na Inang Maria.
