4,414 total views
Bago ang inaasahang pagboto ng mga mambabatas sa Kamara kaugnay ng impeachment complaint laban kay Vice President Sara Duterte, idinaos sa People’s Center ng House of Representatives ang isang “Mass for Accountability.”
Sa kanyang homiliya, iginiit ni Fr. Lino Gregorio V. Redoblado, OFM, Minister Provincial ng Franciscan Province of San Pedro Bautista, na ang pagpapahintulot na umusad ang impeachment process ay hindi pa nangangahulugang may hatol ng pagkakasala, kundi bahagi ng lehitimong proseso ng Konstitusyon upang suriin ang mga ebidensya at tiyakin ang due process.
“Impeachment reminds us that no one is above the law, above accountability, above truth, or above the people whom they are called to serve,” ani Fr. Redoblado.
Ayon pa sa pari, na siya ring Chairperson ng Conference of Major Superiors in the Philippines (CMSP), mahalagang manaig ang katotohanan at pairalin ang tapat, matapang, at malinaw na proseso ng batas.
Binigyang-diin din ni Fr. Redoblado na ang usapin ng impeachment ay hindi lamang tungkol sa iisang personalidad, kundi pagkakataon din upang paalalahanan ang lahat ng nasa pampublikong serbisyo tungkol sa kanilang pananagutan sa mamamayan.
“But let us be clear: this is not only about one person. Our prayer is for all those entrusted with public office and public trust — that they may become more accountable, more transparent, more responsible, and more faithful servants of the Filipino people,” dagdag pa nito.
Nanawagan din ang pari sa mga lider ng bansa na pairalin ang konsensya at katotohanan sa halip na magpadala sa takot, impluwensiya ng politika, o pansariling interes.
Ayon kay Fr. Redoblado, hindi dapat nakabatay sa popularidad o kapakinabangan sa pulitika ang katotohanan, kundi sa moral na pananagutan at paglilingkod sa bayan.
“Today, more than ever, our nation needs men and women who will listen not to the voice of fear, political convenience, blind loyalty, pressure, or personal ambition, but to the voice of the Spirit of Truth,” ayon pa sa pari.
Naging katuwang ni Fr. Redoblado sina Fr. Robert Reyes, Fr. Bong Sarabia, SVD at Fr. Joel Saballa, isa sa nagsumite ng impeachment complaint laban kay VP Sara at anchor priest ng Radyo Veritas.
Kabilang din sa dumalo sa misa ang ilang mga mambabatas, madre at mga kinatawan ng iba’t-ibang relihiyon na sinundan din ng isang Ecumenical Prayer.
