14,083 total views
Nilinaw ng Masungi Georeserve Foundation, Inc. (MGFI) na hindi itinayo ang Masungi Georeserve upang pagkakitaan at magsilbing lugar-libangan.
Ito ang tugon ng institusyon sa pahayag ng Department of Environment and Natural Resources (DENR) na nagsasaad na ang mga gawain sa loob ng Masungi Georeserve ay maituturing na labag sa batas.
Ayon sa MGFI, ang Masungi Georeserve ay inisyatibo upang mapangalagaan at mailigtas ang mga likas na yaman laban sa mga mapaminsalang pag-unlad.
“The Masungi Georeserve is a non-profit conservation initiative run by the MGFI which is a non-stock, non-profit Foundation duly registered at the Securities and Exchange Commission (SEC). Masungi is therefore not a resort, which is built for the primary purpose of entertainment and profit,” ayon sa pahayag ng MGFI.
Iginiit ng institusyon na mahigpit silang sumusunod sa anumang mahahalaga at kinakailangang permit mula sa iba’t ibang ahensya ng pamahalaan bilang pagtalima sa mga batas ng bansa, gayundin ay walang anumang obligasyon sa Bureau of Internal Revenue (BIR).
Taliwas din sa pahayag ng DENR, inihayag ng MGFI na ang ginawang trails o daanan sa loob ng Masungi ay may Certificate of Non-Coverage (CNC) na katumbas ng Environmental Compliance Certificate (ECC) para sa mga proyekto na walang gaanong malaking epekto sa kapaligiran ayon sa itinakda ng Philippines Environment Impact System.
“Masungi is also known for implementing some of the strictest and most sustainable visitor protocols and carrying capacities in the country,” ayon sa institusyon.
Naglabas ng pahayag ang DENR kasunod ng panawagan ni Hollywood actor at environmental activist Leonardo DiCaprio sa administrasyon ni Pangulong Ferdinand Marcos, Jr. na pagtuunan ang pangangalaga sa Masungi Geopark Project.
Una nang inanunsyo ng DENR ang planong pagbawi sa 2017 Memorandum of Agreement na nilagdaan sa pamumuno ng yumao at dating Environment Secretary Gina Lopez na nagbunsod upang masimulan at maisakatuparan ang Masungi Geopark Project.
Binatikos naman ito ng MGFI at iba pang grupo kabilang na ang Caritas Philippines dahil ang hakbang ng kagawaran ay marahil upang higit na bigyang-daan ang operasyon ng large-scale mining, land grabbers, quarrying at pool resorts sa loob ng protected area.
