10,944 total views
Binigyang-diin ni Taytay Bishop Broderick Pabillo na ang habag ng Diyos ang pinagmumulan ng tunay na pagbabago sa buhay ng tao, bunga ng Muling Pagkabuhay ni Hesus.
Ito ang mensahe ng obispo sa pagdiriwang ng kapistahan ng Divine Mercy sa April 12, isang linggo makaraan ang Linggo ng Pasko ng Muling Pagkabuhay ng Panginoon.
Sinabi ni Bishop Pabillo na nagpapakita na ang Pasko ng Pagkabuhay ay hindi lamang alaala kundi konkretong karanasan ng pagbabagong-buhay.
“Ang Muling Pagkabuhay ay nagdadala ng pagbabago… Ito ay para rin sa lahat ng mga tao na tumatanggap sa kanya,” ayon kay Bishop Pabillo.
Ipinaliwanag ng obispo na ang pagbabagong ito ay bunga ng awa ng Diyos sa kabila ng kahinaan ng tao at binigyang-diin na ang Divine Mercy ang nagbibigay ng panibagong simula sa bawat mananampalataya.
“Babaguhin tayo dahil kinahahabagan niya tayo,” ayon sa obispo.
Dagdag pa ni Bishop Pabillo, ang takot at pag-aalinlangan ay hindi hadlang sa pagkilos ng Diyos sapagkat dumating si Jesus at ang unang pagbati niya sa mga alagad ay kapayapaan.
“Kahit na sila ay duwag… hindi nawala ang tiwala ni Jesus sa kanila. Sinugo pa sila,” ani Bishop Pabillo.
Binigyang-halaga rin ng obispo ang pananampalataya kahit hindi nakikita si Kristo, alinsunod sa sinabi ng Panginoon na mapapalad ang naniniwala kahit hindi siya nakita.
Ayon pa kay Bishop Pabillo, ang habag ng Diyos ay nagbubunga ng konkretong pagbabago sa pamayanan.
“Walang nang mahirap sa kanila kasi wala ring mayaman… Nagkakaisa sila,” bilang larawan ng tunay na pagkakaisa at pagbabahaginan ng mga unang Kristiyano.
Hinamon ng obispo ang mga mananampalataya na isabuhay ang habag ng Diyos sa kanilang pang-araw-araw na pamumuhay lalo ngayong nahaharap ang lipunan sa matinding krisis sa ekonomiya bunsod ng mga sigalot na nangyayari sa mundo partikular sa Middle East.
