157,555 total views
Mga Kapanalig, maraming manggagawang kapag hindi pumasok, hindi susuwelduhan. Pero bakit tila iba ang patakaran kapag ikaw ay nasa mataas na posisyon sa gobyerno, katulad ng isang senador?
Ayon kay Senate Deputy Majority Leader and Ethics Committee Chairperson JV Ejercito, ikinokonsidera na ngayon ni Senador Ronald “Bato” dela Rosa na hindi tanggapin ang suweldo niya habang absent siya.
Halos limang buwan nang hindi nagpapakita sa Senado si Senador Bato. Sa kabila nito, patuloy pa rin niyang natatanggap ang kanyang sweldo at allowances na umaabot sa ₱334,000 sa isang buwan. Isipin mo, sa halagang ito, puwede mo nang mapag-aral ang anak mo sa pribadong paaralan para sa isang buong school year!
Ayon sa Philippine Statistics Authority, umaabot lamang sa humigit-kumulang ₱21,544 ang average na buwanang kita ng karaniwang manggagawang Pilipino. Sa ganitong kalagayan, ang paulit-ulit na pagliban sa trabaho ay talagang iniiwasan dahil ito ay may kaakibat na salary deduction, suspensyon, o tuluyang pagkasibak. Ito ang realidad para sa mga ordinaryong manggagawa.
Ngunit sa kaso ng isang senador—isang halál na opisyal na inaasahang magsilbi sa bayan—tila hindi ito umiiral. Ayon pa sa Senado, wala raw “no work, no pay” policy para sa mga mambabatas. Kung gayon, sino ang mananagot kapag hindi nila ginagawa ang kanilang trabaho?
Mula pa noong Nobyembre 2025, hindi na dumadalo sa sesyon si Senador Bato matapos umugong ang balitang may warrant of arrest na laban sa kanya mula sa International Criminal Court (o ICC) kaugnay ng kanyang papel sa war on drugs ng adrministrasyong Duterte. Bilang dating hepe ng Philippine National Police, si Senador Bato ang nanguna sa implementasyon ng Oplan Tokhang, isang kampanyang nagresulta sa libu-libong pagkamatay. Ang mga pagpatay na ito ay malinaw na salungat sa turo ng Simbahan na nagsasabing ang bawat buhay ay may dignidad at halaga. Dahil sa kanyang papel sa giyera kontra droga, may posibilidad raw na dadalhin ang senador sa The Hague. Hindi siya nagpapakita dahil hindi ginagarantiyahan ng pamahalaan ang kanyang seguridad.
Balikan natin ang pag-absent ng senador. Noong Pebrero, naghain ng ethics complaint ang grupong Wag Kang KuCorrupt. Ayon kay dating Finance Undersecretary Cielo Magno—isang miyembro ng grupo—dapat isuspinde ang sahod ni Senador Bato dahil ilang komite sa Senado ang hindi makapagpulong dahil sa kanyang pagliban. Dahil dito, may mga mahahalagang usapin na hindi natatalakay. Giit ng grupo, ang patuloy na pagliban ng senador sa kanyang trabaho ay hindi lang kapabayaan sa tungkulin, kundi pag-abuso sa tiwala ng taumbayan.
Sa gitna ng tumataas na presyo ng mga bilihin at patuloy na paghihirap ng maraming Pilipino, mas nagiging mahalaga ang bawat pisong nagmumula sa kaban ng bayan. Kasama rito ang pinangsusuweldo natin sa mga opisyal ng gobyerno. Ang pagiging lingkod-bayan ay hindi isang pribilehiyo, kundi responsabilidad na dapat ginagampanan nang buong sigasig at katapatan.
Ang tunay na serbisyo ay hindi nasusukat sa posisyon o titulo, kundi sa kakayahang tuparin ang tungkulin at harapin ang pananagutan. Kapag ang tiwala ng publiko ay nasisira at ang pondo ng bayan ay hindi nagagamit nang wasto, nawawala ang saysay ng pagiging lingkod-bayan.
Mga Kapanalig, hindi lamang ito usapin kung tatanggap ba o hindi ng suweldo ang isang senador na napakatagal nang absent. Ito ay tanong ng integridad, pananagutan, at tunay na diwa ng paglilingkod. Itinuturo sa atin ng Bibliya ang kahalagahan ng pamumuno sa pamamagitan ng paglilingkod, na huwaran sa halimbawa ni Kristo sa paghuhugas ng mga paa, gaya ng inilalarawan sa Mateo 20:27. Sa panahong ito, higit kailanman, kailangan natin ng mga pinunong handang manindigan sa salita at gawa, mga pinunong hindi tumatakas sa kanilang tungkulin sa taumbayan.
Sumainyo ang katotohanan.
