6,920 total reads
Pormal nang inilunsad ng Aid to the Church in Need-Philippines ang “Caravan for Peace and Solidarity: Padayon Prelatura sa Marawi” sa Manila Cathedral.
Ayon kay ACN-Philippines National Director Maximus Ventura, layunin ng inisyatibo na makalikom ng pondo para sa pagtatayo ng Pro-cathedral ng Prelatura ng Marawi.
Bilang bahagi ng programa, nagbukas ng exhibit ng Aid to the Church in Need-Philippines sa St. Jude Chapel ng Manila Cathedral noong ika-26 ng Abril, 2026 na magtatagal hanggang sa ika-8 ng Mayo, 2026 bago mag-iikot sa 14 na iba pang mga arkidiyosesis sa buong bansa.
Pagbabahagi pa ni Ventura, layon ng caravan na palakasin ang diwa ng kapayapaan at pakikiisa para sa mga komunidad sa Marawi, sa pamamagitan ng konkretong suporta sa Simbahan sa lugar kung saan nakatakdang gunitain ang ika-50 anibersaryo ng prelatura sa darating na Nobyembre, 2026.
“Iniimbitahan kayo na makiisa sa ating ‘Caravan for Peace and Solidarity: Padayon Prelatura sa Marawi’ ito po ay iikot sa 14 na archdioceses mula sa Archdiocese of Manila paakyat sa Tuguegarao, then Nueva Segovia and it will work its way down to Marawi in time for the 50th anniversary of the Prelature of Marawi in November, 2026.” Bahagi ng paanyaya ni Ventura sa Radyo Veritas.
Matatandaang, bilang bahagi ng pagdiriwang ng ika-10 anibersaryo ng misyon at paglilingkod ng sangay ng pontifical foundation ng Vatican sa bansa na Aid to the Church in Need Philippines ay opisyal na inilunsad noong Enero ang dalawang lokal na fundraising initiatives sa kauna-unahang pagkakataon.
Una, ay ang Padayon sa Prelatura ni Santa Maria sa Marawi (PPSM), na isang inisyatibo upang tumulong sa muling pagpapatayo ng Pro-Cathedral ng Prelatura ng Marawi matapos na magtamo ng matinding pagkasira ang dating St. Mary’s Cathedral sa Marawi City na ginamit ding kuta ng teroristang grupong Maute-ISIS group noong kasagsagan ng Marawi Siege na nagsimula noong Mayo 23, 2017.
Tema ng ika-10 anibersaryo ng ACN-Philippines ang “Share the Light, Keep it Lit!” na layong patuloy na isulong ang paglilingkod at misyon nito sa mga inusig at inaaping Kristiyano sa iba’t ibang panig ng mundo, gayundin sa pagpapalaganap ng pananampalatayang Katoliko na isinasagawa sa diwa ng habag at pakikiisa, sa pamamagitan ng panalangin, tamang impormasyon, at konkretong pagkilos.
