30,128 total views
Pinarangalan ng Cebu City Government si Cebu Archbishop Jose Palma ng Order of Rajah Humabon, ang pinakamataas na parangal na iginagawad ng lunsod.
Sa mensahe ng arsobispo nagpasalamat ito sa pagkilalang natanggap ngunit binigyang diin nitong ang kanyang mga tagumpay sa pagpapastol at paglilingkod sa pamayanan ay dahil sa suporta at pakikipagtulungan ng iba’t ibang sektor ng lipunan at simbahan.
“Sometimes people honor me, but I say, no — all of us are there. That’s the qualification I would like to make… It’s not only me, it’s we, the whole community that are part of all of this we call successful celebrations in Cebu…in this award, they are all here,” bahagi ng mensahe ni Archbishop Palma.
Ginanap ang awarding nitong June 26 sa Seminario Mayor de San Carlos (SMSC) kung saan pinangunahan ni Archbishop Palma ang banal na misa kasama sina Cebu Vicar General Msgr. Rogelio Fuentes SMSC priest-formators sa pangunguna ni seminary Rector Fr. Mhar Vincent Balili at iba pang pari ng arkidiyosesis.
Kasabay ng paggawad ng parangal kay Archbishop Palma ang pagbasbas sa mga tanggapan ng seminaryo, ang St. Charles Borromeo Chapel ng SMSC at ang krus na likha ni National Artist Napoleon Abueva na idineklarang important heritage structures and cultural properties.
Si Archbishop Palma ay inordinahang pari ng Archdiocese of Jaro noong Agosto 1976, naging Auxiliary Bishop ng Cebu noong 1997 at ginarawan ng episcopal ordination January 13, 1998.
Taong 1999 nang italaga ni noo’y santo papa St. John Paul II bilang obispo ng Diocese of Calbayog habang 2006 inilipat bilang arsobispo ng Archdiocese of Palo. Makalipas ang apat na taong paninilbihan sa Palo ay itinalaga ni Pope Benedict XIV si Archbishop Palma bilang arsobispo ng Cebu kahalili kay Cardinal Ricardo Vidal.
Sa loob ng 15 taong pagpapastol sa Archdiocese of Cebu kabilang sa mga mahalagang bahagi ng kasaysayan sa kanyang panunungkulan ang pagdeklarang santo kay San Pedro Calunsod kung saan katuwang si Cardinal Vidal ay nagtungo ang libu-libong Pilipino sa Roma upang saksihan ang canonization rites sa ikalawang Pilipinong santo.
Gayundin ang pangunguna ng arkidiyosesis sa International Eucharistic Congress, ang pagdiriwang ng 500 Years of Christianity lalo’t ang Cebu ang tinaguriang ‘cradle of Christianity’ at iba pang malalaking gawain ng simbahan sa Pilipinas at maging sa buong Asian region.
Ang Order of Rajah Humabon ay naitatag noong 1994 para kilalanin ang mga indibidwal na may natatanging ambag at paglilingkod sa pamayanan.
