17,176 total views
Umaasa si Military Bishop Oscar Jaime Florencio na mauuwi sa usapang pangkapayapaan ang umiiral na alitan sa pagitan ng Israel at Iran kasunod ng pag-iral ng tigil-putukan ng magkabilang panig, sa halip na pairalin ang karahasan na lalo lamang nagpapalala sa kalagayan ng mga inosenteng mamamayan.
Ang mensahe ng obispo ay kaugnay na rin sa umiiral na tigil-putukan sa pagitan ng dalawang bansa, sa inisyatibo ng pamamagitan ni US President Donald Trump upang mahinto ang 12-araw na labanan na kumitil sa buhay ng maraming tao at pagkasira ng mga gusali, at pamayanan sa Iran at Israel.
Sa gitna ng nagpapatuloy na kaguluhan sa Gitnang Silangan partikular sa pagitan ng Iran at Israel, mariing binigyang-diin ng Obispo na ang makatao at maka-Diyos na tugon sa sigalot ay ang bukas at tapat na pag-uusap, hindi ang pagpapalitan ng karahasan.
“Para sa akin, dapat talaga mag-ceasefire dahil marami ang naantala na buhay ng inosente,” pahayag ni Bishop Florencio.
“Ang naaayon sa teaching ng Simbahan ay mag-dialogue, hindi iyon bakbakan. Mag-usap at dalhin sa negotiating table ang mga isyu.” Ayon sa Obispo, kung patuloy na ipagwawalang-bahala ang pagkakataong makipag-usap, lalo lamang lumalalim ang sugat ng hidwaan. Naniniwala ang obispoi na dapat muling pagtibayin ang tiwala at bukas na komunikasyon upang matugunan ang mga ugat ng kaguluhan.
Bilang pastol ng mga kasapi ng Sandatahang Lakas ng Pilipinas, binigyang-diin ni Bishop Florencio na hindi dapat kalimutan ang pinakamahalagang layunin ng bawat hakbang — ang pangangalaga sa buhay at dignidad ng bawat mamamayan.
Giit ng obispo mas mainam na harapin ang magkabilang panig sa isang mahinahong pag-uusap kaysa sa tuluyang pagkawasak ng mga komunidad.
Paalala ni Bishop Florencio na ang tunay na lakas ay makikita sa kakayahang makinig, magpatawad, at magtaguyod ng katarungan sa pamamagitan ng mapayapang paraan.
