959 total views
Patuloy na nanawagan si Pope Leo XIV ng mas pinaigting na pagsusulong ng pagkakaisa at dayalogo sa gitna ng pagkakaiba-iba ng pananampalataya at kultura.
Ito ang mensahe ng Santo Papa kasunod ng kanyang pagbisita sa Algeria na bahagi ng kanyang Apostolic Journey sa African region.
Ayon kay Pope Leo, naging mahalagang hakbang ang naturang paglalakbay upang palalimin ang ugnayan ng mga tao sa kabila ng kanilang pagkakaiba.
“I think we have really had a wonderful opportunity to continue building bridges and promoting dialogue,” pahayag ni Pope Leo XIV.
Binigyang-diin din ng punong pastol ang kahalagahan ng kanyang pagbisita sa isang mosque bilang konkretong halimbawa ng pakikipag-ugnayan sa ibang pananampalataya.
“I think the visit to the mosque was significant… although we have different beliefs, different ways of worshiping, and different ways of living, we can live together in peace,” ani ng santo papa.
Sa gitna ng mga umiiral na hidwaan sa iba’t ibang bahagi ng mundo, iginiit ng Santo Papa na mahalagang maipakita ang ganitong uri ng pagkakaisa at hinimok ang bawat isa na sama-samang isulong ang kapayapaan at pagkakaisa ng mga pamayanan.
“To promote this kind of image is something the world needs to hear today. Together we can continue to offer it through our witness,” dagdag ni Pope Leo.
Pinasalamatan ng Santo Papa ang mamamayan ng Algeria, kabilang na ang mga lider ng bansa, sa mainit na pagtanggap sa kabila ng pagiging minorya ng mga Katoliko sa lugar.
Ikinalugod nito ang pagkakataong mabisita ang lugar ni Saint Augustine sa Hippo kung saan naglingkod ang santo na tagapagtatag ng Order of Saint Augustine na kinabibilangan ng Santo Papa bago maging obispo sa Peru.
