9,197 total reads
Mariing kinondena ng Philippine Misereor Partnership Inc. (PMPI) ang pagpaslang sa kilalang American marine biologist na si Dr. Kent Carpenter, na naglaan ng mahigit limang dekada ng kanyang buhay sa pananaliksik at pangangalaga sa yamang-dagat ng Pilipinas.
Ayon sa PMPI, malaking kawalan sa pandaigdigang komunidad ng agham at sa patuloy na pagsusulong ng pangangalaga sa kalikasan ang pagpanaw ni Carpenter.
“We vehemently condemn this heinous and senseless act of violence against a defenseless individual who dedicated his life to the service of science and the protection of our natural world,” pahayag ng PMPI.
Binawian ng buhay ang 73-anyos na siyentista matapos pasukin ng tatlong armadong lalaki ang kanyang tahanan sa Barangay Ajong, Sibulan, Negros Oriental dakong alas-11:30 ng gabi noong July 12.
Batay sa ulat ng pulisya, binaril si Carpenter ng mga suspek bago tumakas ang mga ito, dahilan upang bumuo ang Philippine National Police (PNP) ng Special Investigation Task Group “SITG Carpenter” upang magsagawa ng masusing imbestigasyon sa krimen.
Kinilala si Carpenter bilang Professor Emeritus ng Old Dominion University at adjunct professor ng Silliman University. Siya ang siyentistang nagpakilala sa Verde Island Passage bilang “Center of Marine Shore Fish Biodiversity” sa buong mundo at ginamit ang kanyang pananaliksik upang isulong ang pangangalaga sa yamang-dagat ng Pilipinas.
Binigyang-diin ng PMPI na bagama’t hindi isinilang sa Pilipinas si Carpenter, inialay naman nito ang malaking bahagi ng kanyang buhay sa pangangalaga ng yamang-dagat ng bansa at pagtatanggol sa kalikasan.
“His legacy will continue to inspire all who champion the rights of nature, especially the rights of our oceans,” pahayag pa ng PMPI.
Umaasa rin ang organisasyon sa mabilis, masusi at malinaw na imbestigasyon upang mapanagot ang mga nasa likod ng krimen at maibigay ang katarungan sa isang siyentistang nag-iwan ng mahalagang ambag sa pangangalaga ng biodiversity ng Pilipinas.
Nauna nang nagpahayag ng pakikiramay ang Protect Verde Island Passage (Protect VIP) campaign network, na kinilala ang malaking ambag ni Carpenter sa pagkilala ng Verde Island Passage sa buong mundo at nanawagan ng masusing imbestigasyon, katarungan, at higit na proteksyon para sa mga environmental defender.
