8,460 total views
Pormal nang tinanggap ni Pope Leo XIV ang pagreretiro ni Parañaque Bishop Jesse Mercado kasabay ng kanyang ika-75 kaarawan, ang itinakdang mandatory retirement age para sa mga obispo.
Kasabay nito, itinalaga ng Santo Papa si Bishop Elias Ayuban Jr., CMF ng Cubao bilang apostolic administrator ng Diocese of Parañaque sa panahon ng sede vacante.
Si Bishop Mercado, na tubong Santa Cruz, Manila, ay inordinahang pari noong March 19, 1977. Noong February 25, 1997, itinalaga siya ni Saint John Paul II bilang auxiliary bishop ng Archdiocese of Manila at pormal na inordinahang obispo noong March 31 ng parehong taon.
Nang itatag ni Saint John Paul II ang Diocese of Parañaque noong December 7, 2002 para sa mga lungsod ng Parañaque, Las Piñas at Muntinlupa, itinalaga rin niya si Bishop Mercado bilang kauna-unahang obispo ng diyosesis.
Bago naging auxiliary bishop ng Maynila, nagsilbi si Bishop Mercado bilang rector ng Pontificio Collegio Filippino sa Roma at ng Holy Apostles Senior Seminary sa Makati. Naging professor at spiritual director din siya sa pre-college department ng San Carlos Seminary, spiritual director ng San Pablo Regional Seminary sa Baguio City, at parochial vicar ng San Isidro Parish sa Pasay City.
Samantala, itinalaga si Bishop Ayuban bilang obispo ng Cubao noong October 4, 2024 at pormal na naluklok sa diyosesis noong December 3 ng parehong taon.
Sa kasalukuyan, anim na ecclesiastical jurisdictions sa Pilipinas ang nasa ilalim ng sede vacante; ang mga diyosesis ng Ilagan, Kabankalan, Masbate, Parañaque at Tagbilaran, gayundin ang Apostolic Vicariate of Jolo.
