57,400 total views
Kinundina ng Philippine Alliance of Human Rights Advocates (PAHRA) ang naging desisyon ng Senado na i-archive ang impeachment complaint laban kay Vice President Sara Duterte.
Ayon kay PAHRA Secretary-General Edgar Cabalitan, nakadidismaya ang naging desisyon ng Senado lalo’t higit ang mga Senador na bomoto kaugnay sa nasabing mosyon na mas piniling itago ang katotohanan mula sa sambayanang Pilipino.
Giit ni Cabalitan, malinaw para sa publiko ang mensahe ng desisyon ng Senado na mas piniling kampihan ang bise presidente sa halip na manindigan para sa katotohanan at katarungang panlipunan.
“For those senators who voted to archive the articles of impeachment, let it be clear. They have chosen to conceal the truth from the Filipino people… Malinaw ang mensahe sa mamamayan: ang mga senador na ito ay mas piniling kampihan si VP Duterte kaysa panindigan ang katotohanan.” Bahagi ng pahayag ni Cabalitan.
Paliwanag ni Cabalitan, hindi nagtatapos sa naturang desisyon ng Senado ang paninindigan ng mga mamamayan sa paghahanap ng katotohanan at pagnanais na mapanagot ang opisyal mula sa iba’t ibang kaso ng katiwalian sa kaban ng bayan na dapat na inilaan para sa kapakanan ng mga mamamayan.
Nanindigan din ang PAHRA na magpapatuloy ang pakikibahagi nito sa laban para sa katotohanan at pananagutan kung saan dapat na maging bukas at abot ng lahat ang katarungan at hindi kontrolado o nahahadlangan ng mga nasa kapangyarihan.
“This is not the end of the road for the truth to come out… But it should never be this hard for Filipinos to seek justice. They should not have to fight tooth and nail for accountability. Justice must be a right freely available to all, not a privilege decided by political will.” Dagdag pa ni Cabalitan.
Samantala, una na ring nagpahayag ng pagkadismaya ang ilang opisyal ng Catholic Bishops’ Conference of the Philippines (CBCP) sa maituturing na pagtataksil ng Senado sa taumbayan at nanawagan na patuloy na ipanalangin ang mga lider ng bansa upang magampanan ang kanilang tungkulin para sa pangkabuuang kabutihan ng bayan.
