412 total views
Tinutulan ng mga makakalikasang grupo ang muling pagbuhay sa usapin ng nuclear energy upang pagkunan ng enerhiya ng bansa.
Kasunod ito ng paglagda ni Pangulong Rodrigo Duterte sa Executive Order No. 164 o ang pagpapatibay sa tungkulin ng bansa para sa nuclear energy program.
Ayon kay Green Thumb Coalition Convenor Jaybee Garganera, mariing tinututulan ng koalisyon ang pagnanais ng pamahalaan na mamuhunan para sa nuclear energy dahil maliban sa ito ang pinakamahal na mapagkukunan ng kuryente ay magdudulot din ito ng panganib sa mga tao.
“Ang Green Thumb Coalition ay nakikiisa sa pahayag at paninindigan nung ilang miyembro tungkol sa usapin nung nuclear power plant,” pahayag ni Garganera.
Naunang nagpahayag ng pagtutol ang Greenpeace Philippines at nananawagan sa pamahalaan na bawiin ang EO 164.
Sinabi ni Greenpeace campaigner Khevin Yu na ang paglagda sa nasabing kautusan ay isinasawalang-bahala ang kapakanan at panawagan ng bawat mamamayan na magkaroon ng tiyak at ligtas na pagtugon sa krisis sa enerhiya.
“Greenpeace is demanding the Duterte administration to revoke EO 164. We believe it is a treacherous move spurred by misguided interests that are not aligned with the interests of the Filipino people,” pahayag ni Yu.
Iginiit ni Yu na hindi rin naaangkop na mamuhunan ang Pilipinas sa nuclear energy dahil kasalukuyan pa ring lubog sa utang ang bansa at unti-unti pa lamang nakakabalik mula sa krisis dulot ng COVID-19 pandemic.
Suportado naman ng Simbahan ang panawagan ng mga makakalikasang grupo na itigil na ang pamumuhunan sa maruming enerhiya at sa halip ay paglaanan ng pondo ang renewable energy na matipid, malinis at ligtas para sa kalikasan at mga tao.