17,267 total reads
Nilinaw ng pamunuan ng National Shrine of Our Mother of Perpetual Help o Baclaran Church na walang nangyaring barilan sa loob ng compound ng dambana matapos ang insidenteng kinasangkutan ng isang lalaking nakainom at may dalang baril noong hapon ng August 30, 2026.
Ayon kay Fr. Rico John Bilangel, C.Ss.R., rector ng Baclaran Church, nangyari ang kaguluhan sa pagitan alas-4:45 hanggang alas-5:00 ng hapon.
“Mahalagang linawin na walang naganap na barilan sa simbahan,” pahayag ni Fr. Bilangel.
Sinabi ng pari na agad na rumesponde ang mga security personnel ng simbahan at mga awtoridad at kasalukuyang nasa kustodiya na ng pulisya ang naturang indibidwal.
“Mabilis na nakapagresponde ang ating security personnel at ang mga awtoridad,” ani Fr. Bilangel.
Ibinahagi pa ng pari na dalawang indibidwal ang nagtamo ng minor injuries sa insidente at agad nilapatan ng paunang lunas.
Nanawagan din ang Baclaran Church sa publiko na huwag magpakalat ng hindi beripikadong impormasyon upang maiwasan ang kalituhan at pangamba sa publiko.
Sa kabila nito, iginiit ng pamunuan ng Baclaran Church ang patuloy na paghihigpit at pagbibigay-prayoridad sa kaligtasan, kaayusan at seguridad ng mga deboto at mananampalatayang dumadalaw sa dambana.
