9,558 total reads
Hinimok ni Pope Leo XIV ang mamamayan na pangalagaan ang dignidad ng tao sa gitna ng mabilis na pag-unlad ng artificial intelligence at umiiral na kaguluhan sa mundo.
Sa kanyang Regina Caeli sa Vatican noong May 17, sinabi ng Santo Papa na mahalagang manatiling nakasentro sa katotohanan ng tao ang anumang makabagong teknolohiya.
“In this era of artificial intelligence, I encourage everyone to commit themselves to promoting forms of communication that always respect the truth of the human person,” ayon kay Pope Leo XIV.
Binigyang-diin ni Pope Leo na dapat nakatuon sa paggalang sa dignidad at katotohanan ng tao ang anumang mga pagbabago at pag-usbong ng teknolohiya.
Muling nanawagan ang Santo Papa ng pagsusulong ng kapayapaan at pangangalaga sa sangnilikha lalo na sa paggunita ng Laudato Si’ Week ngayong taon.
Aminado ang punong pastol ng simbahan na naapektuhan ng mga digmaan ang pagsusulong ng kapayapaan at pagkakaisa sa daigdig.
“Sadly, in recent years, due to wars, progress in this direction has been greatly impeded,” ayon kay Pope Leo XIV.
Dahil dito, hinimok nito ang mga mananampalataya at mga nagsusulong ng integral ecology na paigtingin ang pagkilos para sa kapayapaan at buhay.
“Indeed, caring for peace is caring for life!” dagdag pa ng Santo Papa.
Sa pagninilay naman ukol sa Pag-akyat ni Hesus sa Langit, sinabi ni Pope Leo XIV na ang Ascension ay hindi lamang pangakong malayo kundi “a living bond” na naglalapit sa sangkatauhan sa ganap na pakikipagkaisa sa Diyos.
Paalala rin ng Santo Papa na si Kristo ay nagdadala ng liwanag, pagpapatawad, at pag-asa sa gitna ng kadiliman ng kawalang-katarungan at kawalang-pag-asa bunsod ng iba’t ibang hamong kinakaharap ng lipunan.
