10,509 total reads
Nanumpa na ngayong araw si Dr. Edwin M. Mercado bilang bagong Pangulo at Punong Tagapagpaganap (CEO) ng Philippine Health Insurance Corporation (PhilHealth) sa harap ni Pangulong Ferdinand R. Marcos Jr. sa isang simpleng seremonya sa Malacañang Palace.
Si Mercado ay isang US-trained orthopedic surgeon na may 35 taong karanasan sa pamamahala ng mga ospital.
Pinalitan niya si Emmanuel R. Ledesma Jr. sa pamumuno ng government owned and controlled corporation (GOCC) na namamahala sa National Health Insurance Program (NHIP).
Bago ang pagkakatalaga sa PhilHealth, si Mercado ay naging vice -president ng Mercado General Hospital/Qualimed Health Network mula Marso 2021.
Si Mercado ay nagtapos ng Doctor of Medicine sa University of the Philippines (UP) noong 1987.
Nagtamo rin siya ng Master of Medical Sciences in Global Health Delivery mula sa Harvard Medical School noong 2023 at isang Executive Master’s in Healthcare Administration mula sa University of North Carolina, USA.
Si Mercado ay isang fellow ng Dr. Chunling Lu na isang program director sa Global Health Economics and Social Change, Division of Global Health Equity, Brigham and Women’s Hospital and Department of Social Medicine and Global Health, Harvard Medical School simula noong July 2023.
Kasama rin si Mercado sa ginagawang pag-aaral sa paggamit ng Artificial Intelligence (AI) bilang assistive tool para sa community health workers sa pagbibigay ng primary care.
