824 total views
Naging makabuluhan ang isinagawang 2-day conference ng ikawalong Philippine Conference on New Evangelization sa San Carlos Seminary Auditorium sa Makati City.
Pinangunahan ni San Pablo, Laguna Bishop Buenaventura Famadico ang banal na Misa bilang pagtatapos ng dalawang araw na pagpupulong at talakayan.
Sa pagninilay, sinabi ni Bishop Famadico, dating chairman ng Catholic Bishops’ Conference of the Philippines – Episcopal Commission on Clergy na may mga pagkakataong hindi natutupad ng tao ang kanyang mga gustong plano sa buhay.
Ipinaliwanag ng Obispo na marahil ito’y pagsubok lamang na ipinagkaloob ng Diyos bilang paghahanda sa kanyang mas magandang plano sa buhay ng tao.
“It is in that moment when we realize we are no longer the ones running things that we start to acknowledge but it is God who is now working,” bahagi ng pagninilay ni Bishop Famadico.
Tema ng pagpupulong ang “Transforming Parishes 2022” na layong suriin ang iba’t ibang pagsubok na kinakaharap ng simbahan lalo nitong nakalipas na dalawang taon ng pandemya.
Batid na naging mahirap ang pinagdaanan ng mga parokya nitong pandemya kung saan naging pagsubok ang pagpapalaganap ng mabuting balita ng Panginoon.
Ayon naman kay PCNE Director Father Jayson Laguerta, nawa’y makatulong ang naganap na 2-day conference upang muling maibalik ang sigla sa bawat parokya at komunidad, at maging handa muli ang mga mananampalataya na tanggapin ang mga salita ng Diyos bilang gabay sa buhay.
“Nakita naman ng mga pari na kailangan talaga ng Evangelization o ng pagpapahayag ng salita ng Diyos, ng mabuting balita. Kaya kahit man may pandemya o wala, kailangan pa rin ‘yung misyon ng simbahan ay ipagpatuloy at nangyayari ‘yan kapag tayo ay nag-aanyaya, nagbubukas ng sarili sa mga tao, hindi lang sa loob ng simbahan kung hindi pati na rin sa labas,” ayon kay Fr. Laguerta sa panayam ng Radio Veritas.
Ang two-day conference ng PCNE 8 ay dinaluhan ng halos-500 indibidwal na binubuo ng mga obispo, pari at relihiyoso mula sa iba’t ibang diyosesis na pangunahing tagapagtaguyod sa mahigit tatlong libong parokya sa bansa at sa mga komunidad.
Inorganisa ito ng Office for the Promotion of the New Evangelization ng Archdiocese of Manila sa pakikipagtulungan ng CBCP – Episcopal Commission on Mission at Clergy, Alpha Asia Pacific – Catholic Context, at Divine Renovation Ministry.
