51,394 total reads
Idineklara ng House Committee on Justice ang dalawang impeachment complaint laban kay Pangulong Ferdinand Marcos Jr. bilang ‘insufficient in substance.’
Sa botong 42 pabor, isang tumutol at tatlo ang nag-abstain, idineklara ng komite na walang sapat na laman ang reklamong inihain ni Atty. Andre de Jesus.
Bigo rin ang hiwalay na reklamo na inihain ng Makabayan bloc na pinangunahan ng dating Gabriela Party-list Rep. Liza Maza, matapos itong talunin sa botong 39 laban sa pito, at walang abstention.
Ang desisyon ay matapos ang tatlong araw na deliberasyon ng komite kung saan sinuri ang mga alegasyon, ebidensya, at kalakip na dokumento ng dalawang reklamo.
Bago ang botohan, iginiit ni House Justice Committee chair Batangas Rep. Gerville Luistro ang responsibilidad ng mga mambabatas sa pagdedesisyon.
“Hindi lang ito usapin ng legalidad. Ito ay usapin ding politikal at moral. Let us vote not out of convenience, let us vote with your conscience,” pahayag ni Luistro.
Binigyang-diin din ng mambabatas na dapat isaalang-alang ng bawat miyembro ang kapakanan ng taumbayan sa kanilang boto.
“Isipin natin ang kapakanan ng bawat Filipino. Let us prove that in this hall, the interest of the Filipino people comes first,” ani ni Luistro.
