12,075 total reads
Tinanggal na ng House prosecution sa listahan ng mga testigo sina si Atty. Zuleika Lope, ang chiel of staff Vice President Sara Duterte at House Legislative Security Bureau Executive Director Capt. Belinda Bello sa pagdinig ng Article IV ng impeachment trial.
Ayon kay private prosecutor Atty. Lorna Kapunan, hindi na kinakailangan ang kanilang testimonya matapos suriin ng prosekusyon ang mga ebidensya at testimonya ng unang dalawang testigo mula sa National Bureau of Investigation o NBI.
“It is the wisdom of the public prosecutors… that we find it totally unnecessary, redundant and a surplusage to still present Atty. Zuleika Lopez and, as well, Capt. Belinda Bello,” ayon kay Kapunan.
Ipinaliwanag niya na layunin sanang patunayan ni Lopez ang tatlong bagay kaugnay ng online press conference ni Vice President Duterte noong Nobyembre 23, 2024—na naroon siya sa House detention center nang gawin ang mga pahayag, na narinig ito ng media, at na tunay ang video na iniharap bilang ebidensya.
Gayunman, sinabi ni Kapunan na hindi na ito kailangan dahil inamin na mismo ng depensa na naganap ang naturang press conference at ginamit pa ang parehong video sa kanilang presentasyon.
Dagdag pa niya, “The defense themselves used the very same video… So by their own admission, there is no question about this video.”
Samantala, sinabi rin ni Kapunan na magiging corroborative o pantulong lamang ang testimonya ni Capt. Belinda Bello kaugnay ng utos na ilipat si Lopez sa loob ng House detention facility, na naging bahagi ng konteksto ng naturang press conference.
Dahil dito, sinabi ni Kapunan na nabawasan ng dalawang testigo ang ihaharap ng prosekusyon sa Article IV, na tumatalakay sa sinasabing pagbabanta ni Vice President Duterte laban kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez.
