441 total views
Ang pagdarasal ng Aba Ginoong Maria sa Santo Rosaryo ay hindi kailanman maituturing na paulit-ulit.
Ito ang inihayag ni Lingayen, Dagupan Archbishop Socrates Villegas ngayong Oktubre na buwan ng Banal na Rosaryo.
Ayon sa Arsobispo, ang bawat Aba Ginoong Maria sa mga misteryo ng Rosaryo ay maihahalintulad sa rosas na alay bilang pagpapakita ng pagmamahal sa Mahal na Birheng Maria at sa kanyang anak na si Hesus.
“It is never redundant, it is never repetitious, it is never too much to repeat the Hail Mary in every mystery of the Rosary because every Hail Mary is a rose of love to the virgin Mary and to Jesus her son.” Pahayag ni Abp. Villegas.
Ipinaliwanag pa ni Abp. Villegas na ang rosaryo ay ang bibliya sa anyo ng isang kuwintas, at ang bawat misteryo nito ay ang salita at buhay ni Hesus na pinagninilayan sa pananalangin.
“The Rosary is Holy Bible in beads, the Holy Rosary is the word of God, the life of Jesus in the beads. So when we reflect on the mysteries of the Rosary we are actually reflecting on Jesus Himself, on the life of Jesus and we want that life to be ours.” Dagdag pa ng Arsobispo.
Ngayong darating na biyernes ika-25 ng Oktubre, isasagawa ng Aid to the Church in Need Philippines ang kampanyang 1 Million Children Praying the Rosary.
Kaugnay nito, binigyang diin ni Archbishop Villegas na ang kapangyarihan ng Santo Rosaryo ay nasa kamay ng mga mananampalatayang nananalangin at umaasa sa Mahal na Birhen.
Aniya, sa pamamagitan ng tuloy-tuloy na pagdarasal ay makikita natin ang mga pagbabagong hinihiling, at makakamit ang kapayapaan sa daigdig.
