317 total views
Umabot sa 2,843 pamilya o 11,065 na indibidwal ang nagsilikas sa lalawigan ng Catanduanes matapos manalasa ang bagyong Karen.
Ayon kay Rev. Fr. Renato Dela Rosa, Social Action Director ng nasabing Diocese kasalukuyan na silang nag-iikot sa mga apektadong munisipalidad at pinag-aaralan ang tugon na isasagawa ng Simbahang Katolika.
Ilan aniya Sa mga Parokya at kapilya sa Diocese ng Virac ang nagsilbing evacuation center ng mga apektadong residente kung saan sila ay pinagkalooban ng pantawid gutom tulad ng sopas.
Umaasa si Fr. Dela Rosa sa agarang pagkilos ng lokal na pamahalaan ng Catanduanes sa relief operation habang posible namang magsagawa ng pag-agapay ang Diyosesis sa rehabilitasyon ng mga nasirang bahay matapos ang kanilang isinasagawang rapid assessment.
Samantala, Ilang mga munisipalidad pa aniya ang wala pa rin kuryente at hirap ang linya ng komunikasyon bagamat muli nang nakapaglayag ang mga bangka papunta at paalis ng isla.
Sa datos na ibinahagi ng Social Action Center ng Diocese, 1,329 na Pamilya ang nagsilikas sa Bayan ng Virac, 464 sa San Andres, 235 sa San Miguel, 73 pamilya sa Bagamanoc, 244 na pamilya sa Pandan at 53 pamilya sa munisipalidad ng Payo.
Sa kasalukuyan ay patuloy pang kumikilos pa-kanluran hilagang kanluran ang bagyong Karen sa bilis na 24 na kilometro kada oras.
Inaasahang bukas ng umaga ay nakalabas na ng Philippine Area of Resposibility ang nasabing bagyo habang binabantayan naman ang posibleng pagpasok ng Tropical Storm Haima o Lawin na kasalukuyang nasa 1,616 kilometro silangan ng Visayas.
