1,952 total views
Kapanalig, ang arts o sining ay napakahalaga sa kahit anumang bayan. Sa sining makikilala ang isang tao, isang komunidad, at ang bansa. Ito ay tatak ng ating pagkatao.
Ang sining ay isang form of expression. Sa pamamagitan ng sining, gaya ng tula, musika, sayaw, pag-guhit, pagpipinta, at pagtatanghal, ating naibabahagi ang ating saloobin. Mahalaga ang self-expression sa lahat ng indibidwal dahil mula dito, tayo ay aktibong lumalahok sa lipunan, at sa paglahok na ito, mapapayabong pa natin lalo ang buhay sa ating mundong ginagalawan.
Ang sining ay napakahalaga din sa komunidad. Ito ay isang paraan upang mapag-kaisa ang mga mamamayan tungo sa isang layunin. Ang arts o sining sa mga pamayanan ay senyales ng buhay at pagkakaisa. Senyales ito ng saya. Ang sining sa komunidad ay hindi lamang pumupukaw ng imahinasyon at pagka-malikhain ng mga mamamayan, Ito rin ay maaaring magpasigla pa ng economic activities sa isang pamayanan. Maaaring magbigay buhay ang sining sa turismo ng isang bayan. Maaaring magsimula ito ng mga maliliit na negosyo.
Ang sining kapanalig, ay isang kritikal na aspeto ng ating bayan. Mula dito, ating napapalaganap ang ating kultura bilang isang bansa. Naipapakita nating ang diversity at ang kulay ng iba-ibang rehiyon sa ating bansa. Ang sining din ay nagbibigay sa atin ng sense of belonging. Nakikilala agad natin ang mga sining at likha na mula sa ating sariling lugar, at sa ating pagtingin dito, we feel we are home, kahit papaano, kahit nasaan ka mang parte ng mundo.
Ang sining din kapanalig ay simbolo hindi lamang ng ating pagkakakilanlan, kundi ng ating mga pinahahalagahan. Nakikita rito ang ating values bilang tao, bilang komunidad, bilang bansa. Kaya nga’t sa maraming bansa sa buong mundo, ang sining ay binibigyan ng halaga at prayoridad. Ang mga pamahalaan mismo ang nangunguna sa pagpapayabong ng sining at kultura. Sila rin ang unang tagapag alaga nito.
Sa ating bansa, ang sining at kultura ay hindi nabibigyan ng sapat na atensyon at suporta. Ito lamang nakaraang taon, ang mga cultural agencies ng ating bansa ay nakiusap sa senado ng karagdagang budget upang maipagpatuloy ang kanilang mahahalagang proyekto. Sayang naman kapanalig, kung ating hindi bibigyan ng sapat na suporta ang ating mga arts and cultural agencies. Sa ibang bansa, gaya ng South Korea, ang arts and culture ang naging pangunahing driver o tagapag tulak ng ekonomiya at pagkakakilanlan nila sa buong mundo. Sana ang ating pamahalaan ay maging tunay na tagapangalaga ng ating sining at kultura, at gamitin ito para sa katotohanan at tunay na kagalingan ng sambayanan.
Kapanalig, para sa sa Simbahan, ang arts o sining ay napakahalaga. Sabi nga ni Pope Francis “Artistic creation completes, in a certain sense, the beauty of Creation, and when it is inspired by faith reveals more clearly to people the divine love which is its origin.” Pinapakita rin ng sining ang ating “thirst for God,” at ng ganda at pag-ibig ng Diyos.
Sumainyo ang Katotohanan.
