5,001 total views
Vatican-Inanunsyo ni Pope Leo XIV ang pagkilala kay St. John Henry Newman bilang Doctor of the Church sa gaganaping pagdiriwang sa darating na Nobyembre 1, kasabay ng Kapistahan ng Lahat ng mga Santo.
Ayon sa Santo Papa, si St. John Newman ay nagbigay ng malaking ambag sa pagpapalago ng teolohiya at sa mas malalim na pag-unawa sa doktrinang Kristiyano, lalo na sa konteksto ng Jubilee ng sektor ng edukasyon.
“I will confer the title of doctor of the Church on St. John Henry Newman, who gave a decisive contribution to the renewal of theology and to understanding Christian doctrine in its development, in the context of the Jubilee of the world of education,” ayon sa pahayag ni Pope Leo XIV sa misa ginanap para sa Jubilee of Catechists sa St. Peter’s Square.
Sa proklamasyong ito, ang banal ay ang magiging ika-38 na Pantas ng Simbahan, kabilang sa piling pangkat ng mga santo na kinilala dahil sa kanilang pangmatagalang kontribusyon sa teolohiya at espiritualidad ng Simbahang Katolika.
Kinikilala siya para sa kanyang mga pananaw hinggil sa pag-unlad ng doktrina at sa gampanin ng konsensya.
Si St. Newman, isang teologong Ingles noong ika-19 na siglo, ay unang nakilala bilang paring Anglikano bago pumasok sa Simbahang Katolika noong 1845 sa gabay ni Beato Dominic Barberi.
Pagkaraan ng dalawang taon, naordinahan siyang paring Katoliko at itinatag ang Oratory of St. Philip Neri sa Inglatera. Noong 1879, siya ay ginawang kardinal ni Pope Leo XIII.
Kabilang sa mga kilala at pangunahing Pantas ng Simbahan ay sina San Agustin ng Hipona (St. Augustine of Hippo), Santo Tomas de Aquino (St. Thomas Aquinas) at ang kauna-unahang babaeng pantas na si Santa Teresa ng Ávila (St. Teresa of Avila).
