37,060 total reads
Nanawagan ang BAN Toxics kay Pangulong Ferdinand Marcos Jr. na magpatupad ng mas malawak na hakbang laban sa “triple planetary crisis” dulot ng climate change, polusyon, at pagkaubos ng likas na yaman.
Ayon kay BAN Toxics Deputy Executive Director Jam Lorenzo, nakatuon lamang ang pamahalaan sa flood control at post-disaster aid, habang kailangan ng mga polisiya tulad ng fossil fuel phaseout, nationwide plastic ban, at moratoryo sa malakihang pagmimina.
“We also demand climate accountability from big corporations that have caused and continue to contribute to environmental harm and negative impacts on communities,” ayon kay Lorenzo.
Binatikos din ni Lorenzo ang patuloy na pag-asa ng bansa sa coal na may 57% ng power mix at pagpapalawak ng fossil gas projects, gayundin ang kakulangan ng mas mataas na target para sa renewable energy (RE) kumpara sa pamantayan ng Intergovernmental Panel on Climate Change (IPCC) na 60–70% RE share sa 2030 upang mapanatili ang 1.5°C global warming limit.
Kasabay nito, binigyang-diin ng BAN Toxics ang krisis sa basura matapos makolekta ng Metropolitan Manila Development Authority (MMDA) ang halos 77 metriko toneladang basura sa Metro Manila, na karamiha’y plastic.
Iginiit ng grupo na hindi sapat ang kasalukuyang Republic Act 9003 o ang Ecological Solid Waste Management Act at sa halip, dapat isulong ang nationwide ban sa single-use plastics.
Samantala, umapela naman ang BAN Toxics sa pamahalaan na ipatupad ang moratoryo sa large-scale mining contracts, habang isinusulong ang pag-amyenda sa RA 7076 o ang People’s Small-Scale Mining Act, upang mapalakas ang lokal na industriya ng pagmimina sa paraang tunay na napapanatili at nakatuon sa pangangalaga ng kalikasan.
“Instead of further opening the country to foreign plunder, the government should shift its focus on supporting our artisanal and small-scale miners, who have the potential to contribute meaningfully to the national economy. This support must include capacity-building and access to environmentally sound technologies,” ayon kay Lorenzo.
Binigyang-diin naman ng grupo na ang hindi sapat ang pagbabago sa pag-iisip ng mamamayan bagkus, kailangang baguhin ang sistema upang tunay na matugunan ang ‘new normal’ na dulot ng krisis sa klima.
Una nang binigyang-diin ng namayapang Papa Francisco sa Laudato Si’ na tungkulin ng pamahalaan na pagtibayin ang pagpapatupad ng mga batas na nangangalaga sa kalikasan at sa mahihirap na mamamayang apektado ng pagkasira ng kapaligiran.
