46,801 total views
Binigyang diin ni Antipolo Bishop Ruperto Santos na ang tunay na diwa ng Bagong Taon ay hindi nasusukat sa paglipat ng petsa sa kalendaryo kundi sa konkretong pagbabago ng pag-iisip, pananalita, at pag-uugali ng bawat isa.
Sa mensahe ng obispo sa pagpasok ng taong 2026, iginiit na walang saysay ang pagpasok ng panibagong taon kung nananatiling hindi nagbabago ang puso at asal ng tao na malaking epekto sa pamumuhay sa lipunan.
“Kung hindi tayo magbabago, kahit ilang taon pa ang lumipas, mananatili tayong luma,” ayon kay Bishop Santos.
Tinukoy ng obispo ang tatlong mahahalagang larangan ng personal na pagbabago, ang pag-iisip, pagsasalita, at pag-uugali, bilang pundasyon ng mas maayos na pamilya, pamayanan, at bansa.
Hamon ni Bishop Santos sa mga mananampalataya na unahin ang Diyos sa bawat desisyon at gawain sapagkat ang wastong pag-iisip ang ugat ng mabuting kilos at ugali, at dapat itong nakatuon hindi sa pansariling interes kundi sa kabutihan ng kapwa.
“Hindi tayo tinawag para manlamang, manloko, o magnakaw kahit sa maliliit na paraan. Tinawag tayo para magbigay, magpala, at maglingkod,” giit ng obispo.
Nagbabala rin si Bishop Santos sa publiko laban sa mapanirang pananalita, lalo na sa social media na ayon sa obispo, maraming salita ang nagiging sanhi ng pagkakahati at sugat sa lipunan sa halip na maghatid ng paghilom gaya ng kasalukuyang kalagayang pampulitika sa bansa.
“Magsalita nang totoo. Hindi fake news, hindi tsismis, hindi kasinungalingan,” ani Bishop Santos, kasabay ng paalala na ang salita ay may kapangyarihang maghasik ng galit o magpalaganap ng pag-asa.
Iginiit ng obispo na ang pananampalataya ay dapat makita sa gawa at binigyang diin na hindi sapat ang panalangin at pagsisimba kung hindi ito isinasabuhay sa pamamagitan ng kababaang-loob, paggalang sa batas at kapwa, at kusang-loob na paglilingkod.
“Hindi sapat ang dasal kung hindi nakikita sa asal. Hindi sapat ang misa kung hindi nakikita sa buhay,” dagdag ng obispo.
Nilinaw ni Bishop Santos na ang panawagan ng Bagong Taon ay panawagan sa personal na pananagutan.
“Hinihikayat tayo ng Diyos sa bagong puso, bagong isip, bagong salita, at bagong buhay,” pahayag ng obispo, gayundin ang paalala na ang tunay na pagbabago ay bunga ng pagmamahal sa Diyos, hindi lamang ng pagdiriwang ng Bagong Taon.
(with JM Figarola)
