31,375 total reads
Nanawagan ang Daupang-Palad ng mga Sektor at Taong-Simbahan (DPSTS) sa Prelatura ng Infanta ng mas aktibong pakikilahok ng mga mananampalataya at mamamayan sa pagsusulong ng katarungan, dignidad ng tao at kapakanan ng mga maralita.
Ito ang binigyang-diin sa pahayag-panindigan ng mga kinatawan ng kaparian, relihiyoso, relihiyosa, lider-layko, mga institusyon at batayang sektor sa lalawigan, matapos ang kanilang taunang pagtitipon noong August 20 hanggang 22 sa Parokya ni Nuestra Señora de Salvacion sa Barangay Bianoan, Casiguran, Aurora sa pangunguna ni Infanta Bishop Dave Dean Capucao.
“Naniniwala kami na ang tunay na pagsamba sa Diyos ay hindi maaaring ihiwalay sa pagtataguyod ng katarungan. Ang pananampalataya ay dapat makita sa pakikilahok sa buhay ng pamayanan at sa pagkilos para sa kapakanan ng mga higit na nangangailangan,” ayon sa pahayag.
Tinuran ng DPSTS na patuloy na nararanasan ng mamamayan ang paglala ng kahirapan bunsod ng pagtaas ng presyo ng langis, pangunahing bilihin, kuryente, at pamasahe; mababang halaga ng mga produktong agrikultural; kawalan ng trabaho; mababang sahod; at kawalan ng seguridad sa trabaho.
Binigyang-pansin din ng grupo ang lumiliit na ani ng mga magsasaka dahil sa matinding tagtuyot at sa epekto ng pagbabago ng klima.
Pinuna rin nito ang mga suliraning dulot ng ekonomiyang nakasandig sa pag-export at pag-import, pati ang mga polisiya na naglalayong makahikayat ng dayuhang pamumuhunan, kabilang ang Pax Silica.
Iginiit ng DPSTS na lalo nang mabigat ang dinaranas ng mga mahihirap, partikular na ng mga magsasaka, mangingisda at katutubo, na umaasa sa kalikasan para sa kanilang kabuhayan.
Sa usaping pampulitika, kinondena ng DPSTS ang patuloy na kawalang-katarungan, korapsyon, palakasan, political dynasties at pagbili ng boto na, ayon sa grupo, ay maaaring maisagawa sa anyo ng ayuda system.
“Habang lalong yumayaman ang iilan, lalong naghihirap ang nakararami,” pahayag ng grupo, na binigyang-diin ding “ang hindi pagkakapantay-pantay ang ugat ng mga suliraning panlipunan.”
Ayon sa pahayag, dapat tumugon ang Simbahan bilang isang “field hospital” na malapit sa kalagayan ng mamamayan, nakikinig sa kanilang mga hinaing at nagsisilbing tinig ng mga dukha at walang tinig.
“Ang tunay na pagsamba sa Diyos ay hindi maaaring ihiwalay sa pagtataguyod ng katarungan,” giit ng DPSTS.
Naninindigan ang grupo na palalakasin nito ang pagtataguyod ng dignidad ng bawat tao, katarungang panlipunan, kaunlaran para sa lahat, pakikiisa sa mahihirap at nasa laylayan, at pangangalaga sa kalikasan.
Binigyang-diin din ng DPSTS na ang pananampalataya ay dapat makita sa kongkretong pakikilahok sa buhay ng pamayanan at sa pagkilos para sa mga higit na nangangailangan.
Nanawagan ang grupo sa lahat na magkaisa sa pagtataguyod ng isang lipunang may dignidad, katarungan, pagkakapantay-pantay at malasakit sa kapwa at sa kalikasan.
“Sama-sama tayong maglakbay, magsuri, at kumilos tungo sa iisang misyon—isang lipunang may dignidad, katarungan, pagkakapantay-pantay, malasakit sa kalikasan, at tunay na kapakanan ng lahat,” apela ng DPSTS.
