37,349 total reads
Umaabot sa 51 ang kabuuang bilang ng mga baril na pag-aari ni Vice President Sara Duterte at asawa nitong si Atty. Manases Carpio.
Ito ang naging tampok sa Day 30 ng impeachment trial ni Vice President Duterte.
Ayon sa testigong si PMaj. Joericson Sanggalang ng PNP Firearms and Explosives Office, ang mga baril ay nagkakahalaga ng higit sa pitong milyong piso base na rin sa market value survey.
Si VP Duterte ay may 22, kabilang ang 14 ng pistol, 2 revolver, limang rifle at isang shotgun.
Habang si Atty. Carpio ay may 29 na baril. Kasama na rito ang 16 na pistol, 2 revolver, 10 rifle, at isang baril na expired ang lisensya.
Ayon pa sa testigong si PMaj. Sanggalang sa 15 riple, kabilang din sa pag-aari ng mag-asawa ang class A light weapon na may fully automatic functions- karaniwang ginagamit ng mga pulis.
“Ibig sabihin po nito, ’pag kinalabit po natin iyong gatilyo, sunud-sunod na po iyong puputok,” ayon kay Sanggalang.
Kinumpirma rin ni Sangalang sa korte na ang Type 5 license sa pag-aari ng baril ay walang limit ang bilang hangga’t legal ang mga baril at maayos na nakarehistro.
“Yes po. Hangga’t hindi po siya pumapasok sa Class A light weapons, ay maaari po silang magkaroon basta po LTOPF Type 5 po sila. Wala pong limitation as long as naka-register po ito palagi,” ayon sa opisyal sa pagtatanong ni Senator-Judge Raffy Tulfo.
Nanawagan din si Senator Tulfo ng mas malinaw na deklarasyon ng mga baril sa Statements of Assets, Liabilities and Net Worth o SALN ng mga opisyal ng pamahalaan.
Iminungkahi din ni Tulfo na isa-isang ilista ang mga baril sa SALN sa halip na isama lamang ang mga ito sa pangkalahatang kategorya ng personal na ari-arian.
Samantala, inaasahan bukas araw ng Martes at sa Miyerkules (SEpt 29 at 30) ay haharap sa Senate Impeachment Court si Davao City Mayor Sebastian Duterte bilang testigo sa impeachment trial ng kanyang kapatid na si Vice President Sara Duterte.
Ito ay makaraang aprubahan ni Senate Impeachment Court Presiding Officer Francis Escudero ang kahilingan ni Mayor Duterte na bigyan siya ng karagdagang panahon upang tipunin, ayusin at ihanda ang mga dokumentong saklaw ng subpoena.
