13,646 total reads
Iginiit ng Alyansa Tigil Mina (ATM) na walang umiiral na “responsible mining” sa Pilipinas, sa kabila ng pahayag ng Department of Environment and Natural Resources (DENR) na may mga minahang sumusunod sa wastong pamantayan.
Ayon kay ATM National Coordinator Jaybee Garganera, hindi nararanasan ng mga pamayanang apektado ng pagmimina ang sinasabing responsableng operasyon ng mga kumpanya.
Sa halip, patuloy na naitatala ang mga paglabag sa batas at ang pinsala sa kalikasan at kabuhayan.
“Responsible mining is a deceptive fabrication by government and the mining industry to court public approval of mining activities. In reality, there is no such thing as responsible mining,” pahayag ni Garganera.
Sinabi ni Garganera na maraming proyekto ng pagmimina ang lumalabag sa mga umiiral na batas at regulasyon ng DENR, hindi tumutupad sa mga nakasaad sa kanilang kontrata, at nagsasagawa ng mga operasyon nang walang sapat na kaalaman at konsultasyon sa mga lokal na pamahalaan at mga apektadong komunidad.
“All these certainly point to prevalent irresponsible and destructive mining practices here in the Philippines,” ayon kay Gargarnera.
Tinukoy ng ATM ang mga kilos-protesta at pagbabarikada ng mga residente sa Dupax del Norte at Kasibu sa Nueva Vizcaya, Palawan, Sibuyan Island sa Romblon, Leyte, at Eastern Samar bilang patunay ng patuloy na pagtutol ng mga komunidad sa pagmimina.
Ayon sa grupo, kabilang sa mga suliraning kinakaharap ng mga lugar na ito ang kakulangan ng tunay na konsultasyon, pagputol ng mga puno, pagpasok sa protected areas, pagkasira ng yamang-dagat at sakahan, polusyon sa pinagkukunan ng tubig, at pagkawala ng biodiversity.
Nauna nang sinabi ni Environment Secretary Juan Miguel Cuna na umiiral ang responsableng pagmimina, at mas naging epektibo ang pagbabantay sa mga minahan sa pamamagitan ng paggamit ng drones, iba pang makabagong teknolohiya, at mga ulat sa social media.
Gayunman, sinabi ng ATM na mahirap paniwalaan ang sinasabing responsableng pagmimina habang patuloy na nananawagan ng pagkilos ang mga komunidad na apektado ng pagmimina dahil sa hindi pagtugon ng DENR sa kanilang mga hinaing.
“For us, ‘responsible mining’ is a mere catchphrase invented to convince people to accept mining in their communities,” giit Garganera.
Magugunita sa ensiklikal na Laudato Si’ ang mariing pagkondena ni Pope Francis sa mapaminsalang industriya ng pagmimina na nagdudulot ng labis na paghihirap sa kalikasan at mga apektadong pamayanan.
