39,559 total reads
Ilulunsad ng Diocese of Antipolo ang Weekly Holy Hour for Peace para sa natatanging intensyon ng kapayapaan sa buong mundo.
Ayon kay Antipolo Bishop Ruperto Santos lubhang nakababahala ang kasalukuyang nangyayari sa mundo partikular sa mga bansa sa Middle East kung saan labis na apektado ang inosenteng sibilyan tulad ng kababaihan, matatanda, mga bata at may kapansanan.
“While the Diocese of Antipolo is geographically distant from these battle-scarred places, our Christian duty binds us to the global Body of Christ. The pain of one is the concern of all. And prayer is our most potent act of peace-building,” ayon kay Bishop Santos.
Hiniling ni Bishop Santos sa mga parokya, kapilya, religious communities at lay associations ang pagsasagawa ang Holy Hour for Peace tuwing Huwebes mula June 26, 2025 para sa kapayapaan ng mundo.
Naniniwala si Bishop Santos na ang pagbubuklod ng kristiyanong pamayanan sa pananalangin ay mahalagang hakbang upang mahipo ang puso lalo na ng mga lider ng magkatunggaling bansa na magkasundo sa dayalogo upang magkaroon ng pagpapatawaran tungo sa kapayapaan.
“I particularly appeal to our priests and the ministry of liturgy: please prepare your communities and lead them in this united diocesan act of intercession. For our lay faithful, may your presence before the Lord be a sign of our Church’s unwavering trust in divine mercy. May our diocesan family become a wellspring of peace,” dagdag ni Bishop Santos.
Ipinagkatiwala rin ng obispo sa makainang pagkalinga ng Our Lady of Peace and Good Voyage ang inisyatibo ng diyosesis gayundin ang pakikilakbay at paggabay sa mga mamamayang apektado ng karahasan at digmaan sa iba’t ibang panig ng daigdig.
Patuloy ang pag-igting ng sigalot sa pagitan ng Israel at Iran kung saan mahigit 200 katao na ang nasawi na karamihan ay mga sibilyan habang libu-libo naman ang nasugatan. Kabilang din sa epekto ng digmaan ang nakaambang pagtaas ng presyo ng langis sa pandaigdigang merkado na makaapekto naman sa presyo ng mga bilihin at serbisyo lalo na sa Pilipinas.
Una nang nanawagan si Pope Leo XIV na isulong ang mahinahong dayalogo ng magkabilang panig upang maresolba ang anumang hindi pagkakaunawaan at magkaisang isulong ang pagbubuklod at kapayapaan.
