3,651 total views
Nag-iwan ng pinsala sa ilang parokya sa Eastern Samar ang 6.0 magnitude earthquake na tumama nitong Lunes, ikaapat ng Mayo, batay sa mga ulat mula sa social arm ng Diocese of Borongan at mga lokal na opisyal.
Ayon kay Caritas Borongan Director Fr. James Abella, may mga simbahan at kapilya na nagkaroon ng bitak sa pader at natanggalan ng kisame.
Sa San Pedro Calungsod Quasi-Parish sa Barangay San Eduardo “Bolo”, Oras, naputol ang mga kamay ng imahen ni Hesukristo sa altar dahil sa lakas ng pagyanig.
“May mga structural cracks at damages na nakita sa ilang simbahan at chapels, kabilang ang aming tanggapan sa Caritas Borongan,” ayon kay Fr. Abella.
Batay sa Philippine Institute of Volcanology and Seismology (PHIVOLCS), naganap ang tectonic earthquake bandang alas-2:09 ng hapon, na ang lokasyon ng epicenter ay siyam na kilometro hilagang-kanluran ng San Julian at may lalim na 10 kilometro.
Naitala ang Intensity 5 sa mga bayan ng Can-avid sa Eastern Samar; Dulag at Alangalang sa Leyte; at Gandara sa Samar, habang naramdaman din ang pagyanig sa ilang bahagi ng Southern Leyte, Sorsogon, Masbate, Iloilo, at Davao Occidental.
Ayon pa sa Phivolcs, nasa 29 na bayan at lungsod sa Eastern Visayas ang itinuturing na bulnerable sa lindol dahil sa Philippine Fault Zone at iba pang fault lines.
Sa kasalukuyan, wala pang naitatalang casualty ngunit patuloy ang paalala ng mga kinauukulan sa publiko na maging handa sa posibleng aftershocks.
