4,596 total views
Tiniyak ng Department of Labor and Employment ang pagpigil sa child labor o sapilitang pagtatrabaho ng mga bata.
Ayon kay DOLE Undersecretary for Workers’ Welfare and Protection Cluster – Benjo Santos Benavidez, ito ay sa pamamagitan ng pakikipagtulungan sa National Council Against Child Labor (NCACL), local government units at iba pang ahensya na tumutugon sa suliranin ng child labor.
“Naniniwala ang DOLE na ang mga bata ay nasa paaralan at wala sa lansangan at mga pagawaan, dapat po sila ay malaya, hindi mga manggagawa,” ayon sa mensaheng ipinadala ng DOLE sa Radio Veritas.
Ang mensahe rin ay kaugnay sa paggunita ng ika-apat na anibersaryo ng pagkakatatag sa NACL kung saan idinaos sa Quezon City Hall Risen Garden ang paggagawad ng tulong sa may 100-magulang at kanilang mga anak na napatunayang biktima ng child labor.
Ayon sa Opisyal, ang inisyatibo ay upang mabigyan ng pagkakataon ang magulang na suportahan ang kanilang pamilya sa pamamagitan ng mga DOLE Integrated Livelihood Program (DILP).
“Umaasa ako na hindi dito magtatapos ang ating kampanya laban sa child labor. Sana ay naging paalala ito sa lahat ng participants, members and partners of the NCACL, LGU, parents and guardians at sa inyong mga bata tungkol sa mga programa na inilaan para sa inyo,” ayon naman sa mensahe ni Dominique Rubia-Tutay – DOLE Assistant Secretary for Workers’ Welfare and Protection Cluster na ipinadala ng kagawaran sa Radio Veritas.
Una ng kinilala ng Catholic Bishops’ Conference of the Philippines Office on the Protection of Minors (CBCP-OPM) ang inisyatibo ng DOLE at Department of Social Welfare and Development (DSWD) na tuluyang maiwaksi ang child labor sa lipunan.
Ito ay sa paglulunsad ng Mahalin at Kalingain ating mga Bata o Makabata Hotline upang isulong ang paglaban sa Child Labor kung saan maaring matawagan o makipag-ugnayan ang mga mamamayan sa mga numero bilang 0-9-6-0-3-7-7-9-8-6-3, 0-9-1-5-8-0-2-2-3-7-5 at email address na [email protected] upang isumbong ang mga makikitang pang-aabuso o child labor sa mga bata.
Sa datos ng Philippines Statistics Authority noong 2021, umabot sa 31.47-million ang bilang ng mga nagtatrabahong kabataang nasa edad lima hanggang labing-pitong taong gulang.
Habang noong 2022 ay naitala ng Council for the Welfare of Children na umabot sa siyam na libo ang bilang ng mga kaso ng pang-aabuso sa kabataan sa buong Pilipinas.
