44,323 total views
Nagpaabot ng pagbati ang Laudato Si’ Movement – Asia Pacific kay San Carlos Bishop Gerardo Alminaza sa pagkakahalal bilang bagong chairman ng Catholic Bishops’ Conference of the Philippines-Episcopal Commission on Social Action, Justice and Peace (CBCP-ECSA-JP) at pangulo ng Caritas Philippines.
Ayon sa Laudato Si’ Movement, matagal nang katuwang ng grupo si Bishop Alminaza, na kinikilala bilang matapang na tinig ng Simbahan sa pagsusulong ng pangangalaga sa kalikasan at pagtataguyod ng karapatan ng mga mahihirap.
Hinirang ang obispo kasabay ng 130th CBCP Plenary Assembly sa Anda, Bohol noong July 5, 2025.
“His election is a strong sign of the Church’s commitment to integral ecology and social justice,” pagbati ng Laudato Si’ Movement.
Hiniling naman ng grupo ang pananalangin para kay Bishop Alminaza upang patuloy na patnubayan ng Panginoon sa bagong yugto ng paglilingkod para sa nag-iisang tahanan at sa mga nasa laylayan ng lipunan.
“Let us offer our prayers as he begins this new journey with compassion, courage, and a deep love for God’s Creation,” dagdag ng grupo.
Si Bishop Alminaza ay kasalukuyang vice chairman ng CBCP-ECSA-JP at vice president ng Caritas Philippines simula pa noong 2019.
Hahalili ang obispo kay Kidapwan Bishop Jose Colin Bagaforo, na magtatapos ang termino sa November 30, 2025, at nahalal naman bilang bagong chairman ng CBCP-Episcopal Commission on Interreligious Dialogue.
Magsisimula ang opisyal na termino ng dalawang obispo sa December 1, 2025.
