29,177 total views
Ipinarating ng Diocese of Borongan ang pakikiisa sa mga Pilipinong nasalanta ng magkakasunod na kalamidad na dulot ng bagyong Crising at hanging Habagat.
Ayon kay Borongan Bishop Crispin Varquez, bagamat maayos ang kanilang kalagayan sa Eastern Samar ay hindi nila nakakalimutan ang mga Pilipinong naranasan ang matitinding pagbaha.
Ipinapanalangin ni Bishop Varquez ang katatagan ng loob ng mga Pilipinong patuloy na bumabangon sa mga suliraning dulot ng kalamidad.
“So I hope yung kabuoan yung approach para ma-address ang problema sa flooding and even typhoons sa ating areas sa Pilipinas. So yun ang ating nakita sa lahat ng mga biktima ng floodings, ngayon we pray for you, nakikita namin ang inyong mga paghihirap na sana makabangon muli tayo sa pamamagitan po ng ating pagtutulungan at sa ating pagtitiwala sa Diyos,” ayon sa mensaheng ipinadala ni Bishop Varquez.
Umaasa din ang Obispo na matugunan ng pamahalaan ang suliranin ng pagbaha dahil ang mga mahihirap na kabilang sa most vulnerable sector ang pangunahing naapektuhan ng mga kalamidad.
Bukod sa pakikiisa, inihayag ni Bishop Varquez na nakahanda ang simbahan na tugunan ang pangangailangan ng mga residente na nasalanta ng kalamidad.
Sa tala ng National Disaster Risk Reduction Management Council, umaabot na sa 1.4-million ang bilang ng mga Pilipinong biktima ng pananalasa ng bagyong Crising at Habagat na katumbas ng 401-libong pamilya.
