34,509 total views
Umaasa si Kanyang Kabanalan Pope Leo XIV na magbunga ang mga kasalukuyang hakbang upang mawakasan ang mga digmaan sa iba’t ibang panig ng mundo.
Sa kanyang Angelus sa Castel Gandolfo noong Agosto 17, binigyang-diin ng santo papa ang kahalagahan ng dayalogo at pakikipag-usap upang malutas ang hindi pagkakaunawaan at maisulong ang kabutihang panlahat.
“Let us pray that efforts to bring wars to an end and to promote peace may bear fruit, and that in negotiations the common good of peoples may always be placed first,” ani Pope Leo XIV.
Pinagtibay din ng Santo Papa ang kanyang pakikiisa sa lahat ng mamamayang apektado ng mga digmaan, partikular ang mga inosenteng sibilyang naiipit sa kaguluhan at ang mga kabilang sa bulnerableng sektor gaya ng kabataan, kababaihan, matatanda, at mga may kapansanan.
Ayon sa datos ng World Economic Forum, may humigit-kumulang 60 armadong sigalot sa iba’t ibang bansa sa Middle East, North Africa, at Eastern Europe.
Tinatayang higit sa 200,000 na ang nasawi, 120 milyon ang sapilitang pinalikas, at halos 74 milyon ang kabilang sa mga tinaguriang Internally Displaced Persons (IDPs).
Sa kabuuan, mahigit dalawang bilyong katao ang nakatira sa mga lugar na apektado ng karahasan, kabilang ang tinatayang 400 milyong bata.
Dalangin ni Pope Leo XIV na manaig ang pagkakapatiran at pagbubuklod ng mga mamamayan upang makamtan ang tunay na kapayapaan.
Samantala, sa parehong pagdiriwang ng Angelus, ipinaabot din ng Santo Papa ang kanyang pakikiramay sa mga bansang tinamaan ng malalakas na pagbaha sa South Asia.
“I am close to the people of Pakistan, India, and Nepal who have been struck by violent floods. I pray for the victims, for their families, and for all those who suffer because of this calamity,” aniya.
Kasabay nito, nanawagan ang Santo Papa sa pandaigdigang pamayanan na magtulungan at magbuklod upang maibsan ang hirap ng mga apektadong mamamayan.
