76,837 total views
Inihayag ni Antipolo Bishop Ruperto Santos na ang pagkatalagang national shrine ng isang simbahan ay hindi lamang isang titulo, kundi isang banal na pagtitiwala sa malalim na debosyon ng mananampalataya.
Ito ang mensahe ng obispo sa solemn declaration ng National Shrine of Our Lady of Aranzazu sa San Mateo, Rizal noong Agosto 22, kasabay ng pagdiriwang ng Pagka-reyna ng Mahal na Birheng Maria.
Sinabi ni Bishop Santos na ito ay paalala sa bawat mananampalataya na ang pag-angat sa estado ng dambana ay may kaakibat na gampanin sa pagpapalawak ng debosyon at pagpapalalim ng pananampalataya.
“This is a blessing we must care for. A National Shrine is not just a beautiful church – it is a spiritual beacon. It must be a place of refuge, of healing, of encounter with the Lord and with our Blessed Mother,” ayon kay Bishop Santos.
Hamon ni Bishop Santos sa pamayanan ng San Mateo na ipamalas sa buong bansa at sa mundo na ang national shrine ay hindi lamang isang titulo, kundi isang lugar ng kabanalang makikita sa mamamayan at mga deboto.
“Let this be a place where prayers rise like incense, where the poor are welcomed, where families are strengthened, and where vocations are nurtured. Let this be a shrine that speaks not only to San Mateo, but to the whole Philippines,” ani Bishop Santos.
Pinangunahan ng Kanyang Kabunyian Luis Antonio Cardinal Tagle, Pro Prefect ng Dicastery for Evangelization ng Vatican, ang ritwal ng deklarasyon, katuwang si Bishop Santos.
Sa homiliya ng kardinal, binigyang-diin ang kahalagahan ng pagpapalawak ng misyon ng dambana upang tugunan ang mga suliranin sa lipunan, sapagkat dito matatagpuan ang Mahal na Birheng Maria na umaakay sa bawat isa tungo sa landas ni Hesus.
Tinukoy ni Cardinal Tagle ang sinabi ng Diyos kay Adan sa Aklat ng Genesis, na isinumpa ang lupa dahil sa kasalanan ng tao, at iniugnay ito sa mga kasalukuyang pangyayari sa bansa at sa buong mundo.
Ayon sa kardinal, ang mga nangyayaring isyu tulad ng paglapastangan sa likas na yaman ay bunga ng kapabayaan ng tao.
“Mahalagang paalala yan sa atin nangyayari sa Pilipinas at sa ibang bahagi ng mundo, ang lupa ay parang tinik. At yan ay dahil sa kagagawan ng tao. Mga dating palayan na ngayon ay parang hindi na mamunga-munga, kaunting ulan nagiging mistulang dagat; kapag nawalan ng responsibilidad, kapag namayani ang pagkaganid, nasisira ang lupa, nasisira ang dagat, nasisira ang kalikasan, at ang ating mga trabaho nadadagdagan pa ng korapsyon, ang magiging bunga – tinik, pero huwag tayong mabahala, ang Mahal na Ina nandiyan,” saad ni Cardinal Tagle.
Samantala, sa hiwalay na panayam ng Radyo Veritas kay Fr. Rodrigo Eguia, rector at parish priest ng dambana, ikinalugod nito ang pagkatalagang pambansang dambana at tiniyak na patuloy na itataguyod ang misyon at paglingap sa mamamayan.
Umaasa ang pari na maging bukal ng pag-asa sa bawat peregrinong dadalaw sa dambana ang debosyon sa Mahal na Birhen ng Aranzazu.
“Sana ang pagiging national shrine ng dambana ng Our Lady of Aranzazu ay magdudulot ng higit na pag-asa, lalo na sa mga nahihirapan, may mga pinagdadaanan at nahaharap sa anumang pagsubok na sa pamamagitan ng Mahal na Birhen ay masumpungan ang liwanag ng pag-asang hatid ni Hesus,” pahayag ni Fr. Eguia.
Inaanyayahan ng pari ang mga deboto na dumalaw sa dambana, sapagkat ito ay bukas sa lahat ng pagkakataon upang tanggapin ang mga naghahanap ng kalinga, gayundin ang pagbibigay ng mga sakramento tulad ng kumpisal.
Matatandaang sa ika-129 plenary assembly ng Catholic Bishops’ Conference of the Philippines noong Enero 2025, nagkaisa ang mga obispong gawing national shrine ang dambana ng Mahal na Birheng ng Aranzazu, ang patrona ng Northern Rizal o ng mga bayan ng San Mateo at Montalban.
Batay sa kasaysayan, unang itinatag ng mga Agustinong misyonero ang parokya ng San Mateo noong 1596, habang ang debosyon sa Birhen ng Aranzazu ay nagsimula noong 1716 sa pamamagitan ng Heswitang si Fr. Juan Echazabal.
Dumalo at nakiisa sa pagdiriwang sina Gumaca Bishop Euginus Canete, Nueva Segovia Archbishop Marlo Peralta at mga pari ng Diocese of Antipolo at mga bisitang pari mula sa iba’t ibang diyosesis.
