24,692 total reads
Hinikayat ni Pangulong Ferdinand Marcos Jr. ang mga lokal na opisyal ng pamahalaan na gampanan ang tungkulin bilang konsensiya, gabay, at tinig ng mamamayan upang bantayan ang mga maling gawi at kuwestiyonableng proyekto ng pamahalaan.
Sa kanyang talumpati sa Malacañang, kasabay ng panunumpa sa mga bagong halal na opisyal ng League of Provinces of the Philippines (LPP), binigyang-diin ng Pangulo na mahalaga ang matatag at tapat na pamumuno sa mga lalawigan upang wakasan ang maling nakasanayan sa pamahalaan.
“Kaya’t hinihikayat ko kayo: Paglingkuran natin nang buong katapatan ang sambayanan; tiyakin natin nasa wasto ang mga proyekto na ipinapatupad ng pambansang pamahalaan at ng lalawigan; at isiwalat natin kung may makikitang taliwas,” panawagan ni Marcos sa ginanap na oath taking ceremony ng mga opisyal ng LPP.
Ayon kay Marcos, nasa simula pa lamang ng laban ang pamahalaan at mahaba pa ang landas tungo sa ganap na pagbabago. Kailangan aniya ang aktibong pakikilahok ng mga lokal na pamahalaan sa masusing pagsusuri at pagbabantay upang mailantad ang mga proyektong “nakakubli sa kadiliman.”
Hinimok din niya ang mga opisyal ng LPP na maglingkod nang may buong katapatan, tiyakin ang wastong pagpapatupad ng mga proyekto ng pambansa at lokal na pamahalaan, at isiwalat ang anumang gawain o proyektong taliwas sa interes ng taumbayan.
“Ang pera ng bayan ay hindi para sa pansariling kapakanan kundi para sa sambayanan,” giit ng Pangulo.
Ang panawagan ng Pangulo ay kasabay na rin ng kasalukuyang iregularidad sa mga flood control projects sa gobyerno kung saan hinihinalang sangkot hindi lamang ang mga contractor, at pulitiko kundi maging ang ilang mga opisyal ng Department of Public Works and Highways.
