30,735 total reads
Mariing kinondena ng Commission on the Social Apostolate of the Philippine Jesuits (Society of Jesus Social Apostolate – SJSA) ang sistematiko at malawakang katiwalian na patuloy na nagpapahirap sa sambayanang Pilipino.
Labis na ikinababahala ng grupo ang patuloy na pagkamkam sa budget ng pamahalaan na nauuwi lamang sa bulsa ng mga nasa kapangyarihan, habang pinapasan at unti-unti nitong kinikitil ang buhay ng mga mahihirap.
Binigyang-diin ng SJSA ang ulat ng World Bank, Asian Development Bank, at International Monetary Fund noong 2024 na tinatayang ₱2 trilyon kada taon ang nawawala sa pamahalaan dahil sa katiwalian, gayundin ang datos ni Senador Panfilo Lacson na halos ₱1 trilyon sa pondong inilaan sa flood control projects ay napunta lamang sa bulsa ng mga tiwaling opisyal at kumpanya.
“Ito ang dahilan ng mga sub-standard o “ghost projects” na imprastruktura, na nagbunga ng higit na pagdurusa ng bayan lalo na ng mahihirap tuwing may ulan at pagbaha,” pahayag ng SJSA.
Nanawagan ang mga Heswita ng masusing imbestigasyon sa pamamagitan ng isang independent commission, dahil anila, hindi maaaring imbestigahan ng Kongreso ang sarili nito, at walang dapat na nakahihigit sa batas—pati na ang mga mambabatas.
Iginiit ng grupo na hindi lamang dapat limitado sa flood control projects ang imbestigasyon, kundi dapat ding masaklaw ang mga kagawarang matagal nang inuugnay sa katiwalian, tulad ng Bureau of Customs at Department of Education, gayundin ang paggamit ng confidential funds na naging “executive pork” sa mga nakalipas na taon.
Kabilang din sa kanilang panawagan ang pagpapatupad ng anti-political dynasty provision ng 1987 Constitution, pagsusuri sa party-list system, pagpasa ng Freedom of Information Act at Whistleblowers Act, at sapilitang publikasyon ng Statement of Assests, Liabilities, and Net Worth (SALN) ng lahat ng opisyal.
“Tulad ng mungkahi ng maraming sektor, ang mga deliberasyon ng bicameral committee ng Kongreso—na responsable sa mga lihim na budget insertions na nagbigay-daan sa katiwaliang kinasangkutan ng [Department of Public Works and Highways]—ay dapat gawing bukas at malinaw sa publiko, at dapat ding bigyan ng puwang ang civil society sa komiteng ito,” dagdag ng SJSA.
Tiniyak naman ng SJSA na patuloy na tututukan ang usapin ng katiwalian at hinikayat ang mamamayan na manindigan para kinabukasan ng bayan at mga kabataan.
“Malalim at malawak na ang katiwalian sa ating lipunan… Maaaring mahaba ang landas na tatahakin, ngunit ang pagpapaliban sa paglalakbay na ito tungo sa paglilinis ay lalo lamang mag-uugat sa kasamaan at magdadala ng mas mabigat na pasanin sa ating sambayanan,” saad ng SJSA.
