12,009 total reads
Nagpahayag ng pasasalamat si Kaloocan Bishop Pablo Virgilio Cardinal David, pangulo ng Catholic Bishops’ Conference of the Philippines, kay TV personality at komedyanteng si Vice Ganda sa kanyang paninindigan laban sa katiwalian.
Gayunman, nilinaw ng Kardinal na hindi siya sang-ayon sa panawagan para ibalik ang parusang kamatayan, lalo na laban sa mga tiwaling opisyal ng pamahalaan.
Ayon kay Cardinal David, nauunawaan niya ang galit ng publiko at ang sigaw para sa pananagutan. Subalit, iginiit na ang pagtutol ng Simbahang Katolika sa death penalty ay nakaugat sa katotohanang kadalasang mahihirap ang napaparusahan, samantalang ang mayayaman ay hindi napapanagot.
“I understand the outrage and the demand for serious accountability. But the Church’s opposition to capital punishment is rooted in this reality: in practice, it is almost always the poor who end up executed, while the wealthy escape. Those with money can buy the best legal defense, delay trials indefinitely, or manipulate the system. The defenseless and powerless have no such protection,” ayon sa pahayag ni Cardinal David sa kanyang facebook post.
Paliwanag ng Kardinal, ang mga may pera ay may kakayahang kumuha ng pinakamagaling na abogado, pahabain ang paglilitis, at manipulahin ang sistema habang ang mahihirap at walang kakayahan ay walang proteksyong katulad nito.
Binalikan din ni Cardinal David ang kasaysayan, kung saan madalas ginagamit ang batas bilang sandata ng mga makapangyarihan. Aniya, maging si San Juan Bautista at si Hesus ay mabilis na nahatulan ng kamatayan, habang ang mga tunay na salarin ay nakaligtas.
Dagdag pa ng opisyal ng simbahan; ”History, too, warns us: the law is often weaponized by those in power. Remember how both St. John the Baptist and Jesus were swiftly condemned to death, while the truly guilty walked away unpunished.That’s why the answer to corruption cannot be more death, but a deeper reform of justice — one that protects the poor and holds the powerful accountable”.
Binigyang-diin niya na ang sagot sa korapsyon ay hindi karagdagang kamatayan, kundi mas malalim na reporma sa sistemang pangkaturangan—isang sistemang tunay na magtatanggol sa mahihirap at mananagot ang makapangyarihan.
Ang pahayag ay kaugnay na rin sa isinagawang Trillion Peso March sa Edsa People Power Monument kung saan nanindindan ang may isang daang libong mamamayan laban sa katiwalian at pagpapanagot sa mga sangkot sa anomalya, partikular ang mga ghost at substandard flood control projects ng Departmenf of Public Works and Highways.
