3,909 total views
Inihayag ng National Shrine of Our Lady of Salambao – San Pascual Baylon Parish sa Obando, Bulacan na isasauli nito ang sasakyang ipinagkaloob ni dating Department of Public Works and Highways (DPWH) First District Engineer Henry Alcantara, bago masangkot sa imbestigasyon ng katiwalian.
Ayon sa pamunuan ng dambana, tinanggap nila ang Nissan Navara pick-up noong Hunyo 2024 “in good faith” upang magamit sa pilgrimage o pagdalaw ng imahen ng Mahal na Birhen ng Salambao sa iba’t ibang parokya.
“Gayunman, dahil sa mga lumabas na ulat at akusasyon ng katiwalian laban kay G. Henry Alcantara… napagkasunduan naming isauli ang naturang donasyon,” pahayag ng Sangguniang Pastoral ng parokya.
Kumikilos na ang dambana upang maibalik ang sasakyan sa wastong paraan at sa pamamagitan ng angkop na legal na proseso, alinsunod sa tagubilin ng Diocese of Malolos at ng Catholic Bishops’ Conference of the Philippines (CBCP).
Humingi rin ng paumanhin ang parokya sa publiko sa anumang alalahaning dulot ng donasyon.
“Kung sakaling ito ay nakapagdulot ng alalahanin sa Simbahan at sa sambayanan, kami po ay humihingi ng paumanhin at pinaninindigan namin ang tunay na pagpapahalaga sa katarungan at kung ano ang tama,” dagdag ng pahayag.
Si Alcantara, tubong Bocaue, Bulacan, ay itinalaga bilang district engineer ng first engineering district ng lalawigan noong 2019 sa ilalim ng noo’y DPWH Secretary at ngayo’y Senador Mark Villar.
Kasalukuyan siyang iniimbestigahan kaugnay sa multibillion-peso ghost at substandard flood control projects sa Bulacan, kung saan sinasabing sangkot din ang ilang halal na opisyal ng pamahalaan.
