6,355 total reads
Nanindigan ang Conference of Major Superiors in the Philippines–Justice, Peace, and Integrity of Creation Commission (CMSP–JPICC) na ang malawakang korapsyon sa bansa ay nakamamatay at hindi na dapat ipagwalang-bahala.
Sa Misa ng Bayan noong September 26 sa Religious of the Good Shepherd Convent na pinangunahan ni Cubao Bishop Elias Ayuban Jr., CMF, iginiit ng grupo na malalim na ang sugat na idinudulot ng katiwalian at kinakailangang manindigan ang simbahan at mamamayan.
“Corruption kills—it destroys lives, weakens institutions, and mocks the common good. The wounds of our nation are deep, inflicted by corruption, greed, and betrayal of the people’s trust,” ayon sa pahayag ng CMSP–JPICC.
Binatikos ng grupo ang mga iregularidad sa multibillion-peso flood control projects at ang hindi maipaliwanag na confidential funds ng ilang matataas na opisyal.
Inihayag ng grupo na ang pondong nakalaan para sa kaligtasan at kabutihan ng mamamayan ay nagiging kasangkapan ng kasakiman at pagtataksil sa bayan.
“We proclaim before God and the nation that public resources must serve the people, not enrich the powerful. What was intended to protect our people has too often been twisted into opportunities for corruption, leaving the poor abandoned in times of disaster and the nation robbed of trust,” dagdag ng CMSP–JPICC.
Ginunita rin sa misa ang ika-16 anibersaryo ng Bagyong Ondoy, ang pagbaha noong 2009 na kumitil ng mahigit 400 buhay.
Ayon sa grupo, bagama’t lumipas na ang maraming taon, ang bansa ay muling “binabaha”—hindi ng tubig kundi ng korapsyon sa pamahalaan.
Nanindigan ang CMSP–JPICC na bilang mga relihiyoso, hindi sila maaaring manahimik sa harap ng matinding suliranin ng lipunan.
“As consecrated persons, our silence would make us complicit. Our vows to poverty, chastity, and obedience are not escapes from the world’s problems but a radical commitment to the Gospel, which commands us to defend the poor, the excluded, and the oppressed,” anila.
Binigyang-diin ng grupo na ang Misa ng Bayan ay hindi lamang pagsamba kundi isang malinaw na pahayag ng pagtutol laban sa katiwalian.
Sa paggunita ng Taon ng Hubileyo, nanawagan ang CMSP–JPICC ng sabayang pagkilos upang managot ang mga tiwaling lider at muling ibalik ang tiwala sa pamahalaan.
“In this Year of Hope, we affirm: hope is not naïve optimism. It is resistance. It is indignation transformed into action. True hope denounces lies, unmasks injustice, and insists that a new dawn is possible,” ayon sa kanilang pahayag.
