8,382 total reads
Itinalaga ni Pangulong Ferdinand Marcos Jr. si dating Philippine National Police Chief General Rodolfo Azurin Jr. bilang bagong Special Adviser at Investigator ng Independent Commission for Infrastructure o ICI.
Papalitan ni Azurin si Baguio City Mayor Benjamin Magalong na una nang nagbitiw sa puwesto matapos pangunahan ang pagbabantay sa integridad ng komisyon.
Ayon sa Palasyo, sisimulan ni Azurin ang kanyang tungkulin matapos maisaayos ang ilang personal at administratibong usapin. Pinasalamatan naman ng Pangulo ang serbisyo ni Magalong na naging mahalaga sa laban kontra korupsiyon sa mga proyektong pang-imprastruktura.
Naniniwala ang administrasyon na ang karanasan at pamumuno ni Azurin ay magpapatibay sa mandato ng ICI na tiyakin ang accountability at transparency sa paggamit ng pondo ng bayan.
“The administration is confident that General Azurin’s experience and leadership will further strengthen the Commission’s mandate to uphold accountability and transparency in the use of public funds,” ayon sa pahayag ng palasyo.
Matatandaang binuo ni Pangulong Marcos ang ICI upang magsagawa ng imbestigasyon sa mga anomalya sa mga flood control projects.
Si Azurin ay tubong Paniqui, Tarlac at lumaki sa La Trinidad, Benguet. Siya ay nagtapos sa Philippine Military Academy ‘Makatao’ class of 1989.
Bago naging pinuno ng PNP noong 2022, si Azurin ay nagsilbing commander ng Northern Luzon Police Area, PNP Northern Luzon, at Ilocos region police chief.
