17,198 total views
Nanawagan ng agarang tulong ang humanitarian, development at advocacy arm ng Catholic Bishops’ Conference of the the Philippines para sa mga Diyosesis ng Masbate at Romblon na labis na nasalanta ng Bagyong Opong.
Ayon kay Caritas Philippines President, Kidapawan Bishop Jose Colin Bagaforo, nangangailangan ng sama-samang pagtugon upang maibsan ang hirap ng mga pamilyang apektado ng nagdaang kalamidad.
“On behalf of the Dioceses of Masbate and Romblon, which were the most severly affected areas by Typhoon Opong, we would like to issue this urgent appeal for your help and support for our brothers and sisters in these areas as well as in other affected dioceses,” panawagan ni Bishop Bagaforo.
Batay sa huling ulat noong September 28, 2025, kapwa walang suplay ng kuryente ang Masbate at Romblon, mahina ang linya ng komunikasyon, mabagal ang clearing operations, at apektado ang suplay at presyo ng tubig at iba pang bilihin.
Maraming bahay at istruktura rin ang napinsala ng bagyo habang karamihan sa mga residente ay umuwi na lamang upang ayusin ang kanilang mga tahanan sa halip na manatili sa evacuation centers.
Kabilang sa mga pangunahing pangangailangan ng mga naapektuhan ang pagkain, household items at sanitation kits, malinis na inuming tubig, solar lamp at charger, generator, at mga gamot, lalo na para sa sugat.
Ayon pa sa initial assessment ng Caritas Philippines, kinakailangan din ng mga kagamitan para muling maitayo ang mga bahay at simbahan, gayundin ng mga alternatibong kabuhayan upang makabangon ang mga pamilya sa gitna ng krisis.
Hinimok din ng institusyon ang publiko na magbahagi ng donasyon upang mapabilis ang pagtulong sa mga biktima ng kalamidad.
Para sa cash donations, maaari itong ipadala sa Account name na CBCP Caritas Philippines Foundation Inc. sa BPI Account No.: 4951-007116 o 4951-007108; sa Metrobank Account No.: 632-7-632-028586; at sa BDO Account No.: 004508034192.
Sa mga nais namang magpaabot ng in kind donations, makipag-ugnayan lamang kay Ms. Analyn Julian sa numerong 0916-694-5278.
Maaari ring direktang ipadala ang mga tulong sa tanggapan ng mga apektadong diyosesis.
“Let us pray for our dear brothers and sisters affected by Typhoon Opong,” ayon kay Bishop Bagaforo.
