33,199 total views
Itinalaga ng Kanyang Kabanalan Pope Leo XIV si Fr. Edwin Panergo ng Diocese of Lucena bilang bagong Obispo ng Diocese of Boac.
Si Bishop-elect Panergo ay kasalukuyang Rector ng Our Lady of Mount Carmel Seminary sa Sariaya, Quezon, at hahalili kay Bishop Marcelino Antonio Maralit Jr. na inilipat sa Diocese of San Pablo noong 2024.
Ipinanganak sa Lucena City, si Bishop-elect Panergo ay nagtapos ng Philosophy sa St. Francis de Sales Seminary sa Lipa City, Batangas, at Theology naman sa St. Alphonsus School of Theology sa Lucena.
Naordinahan siyang pari ng Diocese of Lucena noong Setyembre 8, 1997, at sa kasalukuyan ay pinangangasiwaan niya ang Commission on Vocation ng diyosesis.
Nagtapos siya ng Master’s Degree in Guidance Counseling sa St. Louis University sa Baguio City at Licentiate in Sacred Theology sa Notre Dame de Vie sa France.
Bilang bagong obispo, ipapastol ni Bishop-elect Panergo ang mahigit 250,000 Katoliko ng diyosesis na bumubuo sa buong lalawigan ng Marinduque, katuwang ang humigit-kumulang 70 pari sa 14 na parokya.
