30,244 total reads
Nanawagan si Fr. Ramon Jade Licuanan, rektor at kura paroko ng Minor Basilica and National Shrine of Jesus Nazareno, na ibalik ng mga Pilipino ang “tunay na malasakit” sa kapwa na isang katangiang unti-unting nawawala sa lipunan.
Ito ang sentro ng mensahe ng pari sa kauna-unahang National Balangay Conference na ginanap sa Cuneta Astrodome noong November 26.
“Kung may malasakit tayo, hayaang makita ng lahat ang Poong Jesus Nazareno, lalo na ang mga mahihina,” ani Fr. Licuanan, sabay paalala sa mga kasapi ng balangay na tulungan ang isa’t isa sa pag-aalalay sa mga debotong dadalo sa Traslacion.
Binanggit ng pari na ang “tunay na deboto” ay hindi humaharang sa imahe ng Nazareno, kundi nangunguna sa pagpapakilala sa Kanya.
Dismayado rin ang pari sa kawalan ng malasakit sa iba’t ibang aspeto ng lipunan, lalo na sa katiwalian.
“Kapag may malasakit tayo sa ating kababayan, hindi tayo kukuha ng kaban ng bayan para sa sariling kapakanan,” giit ng pari.
Hinimok ni Fr. Licuanan ang mga Pilipinong pinanghihinaan ng loob na tumingin sa imahe ng Jesus Nazareno, na nagpapakita ng pagbangon sa gitna ng hirap at pasanin.
Binigyang diin niyang sa anumang pagsubok, hindi dapat kumapit ang tao sa kasamaan.
“Huwag nating ipagpalit ang kaluluwa natin… sa samantalang kaginhawahan o kasamaan,” saad ni Fr. Licuanan.
Hinamon din ng pari ang mga deboto na magbuklod sa paglilingkod sa Jesus Nazareno at tingnan ang Mahal na Birheng Maria bilang huwaran ng pagiging disipulo at pagkakaisa.
Tinatayang 4,000 deboto mula sa iba’t ibang balangay sa buong bansa ang dumalo sa pagtitipon, kasama sina Pasay City Mayor Imelda Calixto-Rubiano at Rep. Antonino Calixto.
Nagbahagi rin ng kanilang karanasan ng debosyon sina newscaster Jiggy Manicad at Feast International Builder Roberto Cabrillas.
