29,733 total reads
Hinimok ng opisyal ng CatholiC Bishops’ Conference of the Philippines (CBP), ang mga mananampalataya na buong pusong tanggapin si Hesus sa Pasko at hayaang manahan Siya sa kanilang mga puso at buhay.
Ito ang binigyang-diin ni Taytay, Palawan Bishop Broderick Pabillo, Chairperson ng CBCP Office on Stewardship, sa kanyang mensahe sa Kapistahan ng Pagsilang ng Panginoon, kung saan ipinaalala niya ang dakilang biyaya ng Diyos sa sangkatauhan sa pamamagitan ng pagkakatawang-tao ni Hesukristo.
Ayon kay Bishop Pabillo, higit na mas marami ang tinanggap ng tao mula sa Diyos kaysa sa naibabalik nito.
“Sobra ang ating natanggap sa Diyos kaysa ating ibinigay sa Kanya. Pahalagahan naman natin ang regalo na natanggap natin,” ani ng obispo.
Ginamit niya ang karaniwang kaugalian ng exchange gift tuwing Pasko upang ipaliwanag ang mas malalim na kahulugan ng pagdiriwang. Bagama’t may mga nadidismaya sa regalong natatanggap, iginiit ng obispo na ang tunay na “palitan ng regalo” ay naganap sa unang Pasko—ang pagkakaloob ng Diyos ng Kanyang Anak para sa kaligtasan ng sangkatauhan.
“Nag-exchange gift ang Diyos at ang tao; binigay natin ang ating pagkatao, at binigay ng Diyos ang Kanyang pagka-Diyos,” giit ni Bishop Pabillo.
Dagdag pa niya, sa kabila ng sukdulang awa at habag ng Diyos, patuloy pa ring nagkakasala ang tao. Kaya naman mahalaga umanong manaig hindi lamang tuwing Pasko kundi sa pang-araw-araw na buhay ang diwa ng pasasalamat sa lahat ng biyayang tinatanggap mula sa Diyos.
Pinuna rin ng obispo ang labis na pagkabaling ng pansin ng marami sa materyal at komersyal na aspeto ng Pasko—tulad ng mamahaling regalo at marangyang dekorasyon—sa halip na ituon ang pagdiriwang kay Hesus na siyang tunay na sentro ng Kapaskuhan.
“Marami pang iba ang pinagkakaabalahan natin sa Pasko, maliban si Jesus, ang Anak ng Diyos na naging tao,” ayon sa obispo.
Binigyang-diin din ni Bishop Pabillo na hindi sapat ang pagiging makatao lamang; higit na mahalagang isabuhay ang pagiging maka-Diyos upang maiwasan ang mga gawaing hindi karapat-dapat sa tao, gaya ng pagsasamantala, pagkainggit, at labis na pagmamahal sa pera.
Nagpaalala rin siya laban sa panganib ng espirituwal na pagkabulag, na ayon sa banal na kasulatan ay naparito ang Panginoon sa Kanyang bayan ngunit hindi Siya tinanggap.
Sa pagtatapos ng kanyang mensahe, hinamon ni Bishop Pabillo ang bawat isa na ihanda ang malinis at bukas na puso sa pagtanggap kay Hesus—hindi lamang sa salita kundi sa gawa.
“Hindi lang natin tanggapin si Jesus. Gayahin natin Siya,” hamon ng obispo.
