68,456 total reads
Nagpapasalamat si Fr. Robert Arellano, Parochial Vicar ng Minor Basilica at National Shrine of Jesus Nazareno sa Quiapo, sa mga debotong dumalo sa taunang pagbababasbas ng mga Standarte at replika ng Poong Hesus Nazareno.
Ayon kay Fr. Arellano, ang Replica Blessing ay higit pa sa isang tradisyonal na gawain.
“Ang ginagawa nating Replica Blessing ay isang tanda ng pagbababasbas at pagbibindisyon sa mga imahen o replika ng ating mahal na Poong Jesus Nazareno, na kung saan ang mga imaheng ito ay nagiging sagrado. Ito ang ginagawa natin bilang imahen, bilang tanda ng ating pananampalataya na minsan sa kasaysayan natin, ang Diyos ay naging bahagi natin, nakiisa sa atin, at naging tao liban sa kasalanan. Isa itong pagpapatunay na ang Diyos ay talagang mabuti at nagpakumbaba nang higit sa lahat para sa ating kaligtasan,” ayon pa sa panayam ng Radyo Veritas kay Fr. Arellano.
Ayon sa pari, ito ay sagradong seremonya na nagbibigay-biyaya sa mga imahen at replika, na nagsisilbing paalala ng pananampalataya at debosyon ng mga Pilipino sa Poong Hesus Nazareno.
Ipinaliwanag ng pari na ang mga imaheng ito ay sumasagisag sa pagkakatawang-tao ng Diyos, na nakiisa sa sangkatauhan at nagpakita ng kabutihan, kababaang-loob, at pag-ibig para sa kaligtasan ng lahat.
Bilang bahagi ng paghahanda sa Kapistahan ng Poong Hesus Nazareno sa January 9, tiniyak ni Fr. Arellano na ang bawat pagbababasbas ay simbolo ng pananampalataya ng deboto at ng kanilang pamilya.
May higit sa isang libong istandarte at replika ang nabasbasan sa araw ng pagdiriwang, bilang handog at paggunita sa taunang kapistahan ng Poong Hesus Nazareno na gaganapin sa January 9.
