53,348 total views
Tiniyak ni San Jose Nueva Ecija Bishop Samuel Agcaracar, SVD ang pagsusulong ng mas malalim na pakikipagdayalogo at pakikipamuhay sa sambayanan bilang pangunahing gawain ng kanyang pagpapastol sa diyosesis.
Ito ang binigyang-diin ng bagong obispo matapos maordinahan nitong January 17 sa Holy Spirit Chapel ng Divine Word Seminary sa Tagaytay City. Ayon kay Bishop Agcaracar, mahalaga ang patuloy na pakikipag-ugnayan ng Simbahan sa lahat ng sektor ng
lipunan, kabilang ang pamahalaan at iba pang institusyon, upang maisulong ang tunay at pangmatagalang pagbabago sa pamayanan. “Although we are a Catholic country, we as a Church should continue to dialogue and create opportunities to network with the government and other agencies with whom we can share our vision and transform our society,” ayon kay Bishop Agcaracar.
Binanggit ng obispo na ang diwa ng synodality, ang pakikinig, pakikilakbay, at sama-samang pagdedesisyon, ang magsisilbing gabay sa kanyang pamumunong pastoral. Binigyang-diin din ng pastol ang kahalagahan ng pakikipamuhay sa
nasasakupang kawan upang ganap na maisakatuparan ang pagiging Simbahang naglalakbay nang magkakasama.
Kabilang sa mga prayoridad ni Bishop Agcaracar ang pagpapaigting sa Basic Ecclesial Communities (BECs) ng diyosesis na kanyang itinuring na mahalagang plataporma ng ebanghelisasyon, lalo na sa mga munting pamayanan. “I have heard that our diocese in San Jose has a strong Basic Ecclesial Communities. And I think that is already a very good platform for us to enhance and incorporate into the biblical ministry… because I believe that if these ecclesial communities are not rooted in the divine word, something is missing,” dagdag pa ng obispo.
Binigyang-halaga rin ng bagong pastol ng San Jose Nueva Ecija ang pangangalaga sa kalikasan bilang mahalagang bahagi ng misyon ng Simbahan, alinsunod sa diwa ng Laudato Si.
Kaugnay nito, ibinahagi niya ang adbokasiyang “We Are All Farmers,” isang paanyaya sa sama-samang pananagutan sa pag-aaruga sa kalikasan at sa mga magsasaka, lalo’t kinikilala ang lalawigan bilang rice granary ng bansa.
“The spirit of Laudato Si, for me, is a spirituality, a call for conversion… ‘We are all farmers’ is not just a socio-political statement, but an invitation to take care of our common home,” ayon kay Bishop Agcaracar.
Hinimok din ng obispo ang mga pari at layko ng diyosesis na magkaisa sa pagtataguyod ng misyon ng Simbahan upang maisulong ang tunay na pag-unlad at paglago ng pananampalataya sa pamayanan.
“There are many good people waiting to be tapped, willing to contribute to the Church’s mission,” dagdag ng obispo.
Pinangunahan ni Cardinal Luis Antonio Tagle, Pro-Prefect ng Dicastery for Evangelization ng Vatican, ang episcopal ordination ng bagong obispo katuwang sina Papal Nuncio to the Philippines Archbishop Charles Brown at San Jose
Occidental Mindoro Bishop Pablito Tagura, SVD. Itinakda naman ng Diocese of San Jose ang pagluklok kay Bishop Agcaracar sa February 6, 2026.
