232,238 total reads
Hinimok ni Kalookan Bishop Emeritus Deo Gracias Iñiguez Jr ang mga mananampalataya na sundin at tularan ang buhay ni Saint Francis of Assisi upang higit pang mapalalim ang pagsunod sa Panginoon at pagmamahal sa kapwa.
Ito ang mensahe ng Obispo sa pangunguna niya sa misang inialay para sa Franciscan Jubilee Year sa Parish of Saint Francis of Assisi sa Meycuayan, Bulacan. Ayon kay Bishop Iñiguez, ang halimbawa ni San Francisco ay nagpapakita kung paano maging daluyan ng pagmamahal ng Diyos, lalo na sa mga mahihirap at nangangailangan.
“Kilala natin si San Francisco sa kanyang pagkilala at pagmamahal sa Diyos, at sa kanyang malasakit sa kapwa-tao. Ito ang dapat nating taglayin upang maging tunay na anak ng Diyos at tagapagtaguyod ng pananampalataya,” ani Bishop Iñiguez sa Radyo Veritas.
Binigyang-diin ng Obispo ang kadakilaan ng Santo, na walong siglo na ang nakalipas, at ang kanyang pakikiisa sa mahihirap matapos iwanan ang marangyang pamumuhay. Aniya, ang ika-800 anibersaryo ng kanyang pagpanaw ay paalala para sa lahat na pagnilayan at palalimin ang sariling pananampalataya.
“Sapagkat ngayon ang walong daang taon mula nang pumanaw si San Francisco, itinuturing natin siyang dakilang santo. Ang paggunita na ito ay hamon sa atin na gawing banal at makabuluhan ang bawat sandali ng ating pananampalataya,” dagdag pa ni Bishop Iñiguez.
