19,302 total views
Hinimok ni Manila Archbishop Cardinal Jose Advincula ang mga mananampalataya na harapin hindi lamang ang personal na kasalanan kundi maging ang pagkukulang ng lipunan sa pagsisimula ng panahon ng Kuwaresma.
Sa kanyang homiliya ngayong Miyerkules ng Abo sa misang ginanap sa Arzobispado chapel na dinaluhan ng mga kawani ng RCAM, binigyang-diin ng kardinal na ang tanda ng abo sa noo ay paanyaya sa tapat na pagsusuri ng sarili at ng sambayanan.
“We confess that we are sinners, not only as individuals, but also as a people. We dare to face the corruption, injustice, and compromises that afflict our nation and become aware of our own participation in them, whether by action, silence, or indifference,” pahayag ni Cardinal Advincula.
Ayon sa kardinal, ang mga abo na inilalagay sa noo ng bawat mananampalataya ay tanda ng paghilom at pagbabalik loob.
Paliwanag ni Cardinal Advincula na ang abo ay naghahayag ng katotohanan tungkol sa tao kabilang na ang kahinaan, pagiging makasalanan, at pagiging panandalian ng buhay.
“God does not ask us to wear ashes to shame us, but to heal us… Ashes tell the truth about us. They strip away the illusions and hallucinations that we often have about ourselves,” dagdag pa ng kardinal.
Binigyang-diin ng arsobispo ang kahalagahan ng pagiging totoo sa harap ng Diyos, lalo na sa gitna ng kulturang nakatuon sa panlabas na anyo at pagpapakitang-tao.
Sa pagninilay ng kardinal, ang Kuwaresma ay hindi panahon ng pagpaparusa sa sarili kundi paghahanda ng puso para sa Pasko ng Muling Pagkabuhay ni Hesus.
“The ashes on our foreheads are not a mark of despair, but of hope,” ayon sa arsobispo.
Hinimok ni Cardinal Advincula ang mga mananampalataya na huwag magmadaling punasan ang abo sa noo, bagkus hayaang magsilbing paalala ng pag-ibig at awa ng Diyos.
Sa pagsisimula ng 40 araw na paglalakbay ng Kuwaresma, paalala ng arsobispo na ang tunay na pagbabalik-loob ay hindi lamang panlabas na pagsunod sa mga debosyon kundi isang “journey of the heart” tungo sa mas malalim na pakikipag-isa kay Kristo.
